ഫുട്ബോൾ കൂടുതൽ ദൂരത്തേയ്ക്ക് ത്രോ ചെയ്യുന്ന സ്ത്രീ; ഗിന്നസ് റെക്കോർഡ് കരസ്ഥമാക്കി ഐറിഷ് താരം

ലണ്ടൻ/ഡബ്ലിൻ ∙ ലോകത്ത് ഏറ്റവും ദൂരേയ്ക്ക് ഫുട്‌ബോള്‍ ത്രോ ചെയ്യുന്ന സ്ത്രീയെന്ന നേട്ടം കരസ്ഥമാക്കി ഐറിഷ് താരം മെഗാൻ കാംപ്ബെൽ. 37.55 മീറ്റർ (123 അടി 2 ഇഞ്ച്) ദൂരത്തിൽ ഫുട്ബോൾ എറിഞ്ഞ് ത്രോ-ഇൻ റെക്കോർഡ് ആണ് ലണ്ടൻ സിറ്റി ലയണസ് താരം കൂടിയായ മെഗാൻ കാംപ്ബെൽ നേടിയത്.

ഏപ്രില്‍ 30 ന് നടന്ന ടീം പരിശീലനത്തിനിടെ ആണ് റെക്കോർഡ് നേടിയത്. ഈ നേട്ടം ഏറെ സന്തോഷിപ്പിക്കുന്നുവെന്നും ഇതിനെ മറികടക്കുന്ന ഒരാള്‍ വരണമെന്നും മെഗാൻ കാംപ്ബെൽ പറഞ്ഞു. അപ്പോൾ മാത്രമാണ് മറ്റൊരാളെ തന്നെക്കാള്‍ മെച്ചപ്പെട്ട ഒരാളാക്കി താന്‍ മാറ്റി എന്ന് സ്വയം തോന്നുകയുള്ളുവെന്നും മെഗാൻ കാംപ്ബെൽ കൂട്ടിച്ചേര്‍ത്തു. അയർലൻഡിലെ ദ്രോഗഡയാണ് മെഗാൻ കാംപ്ബെലിന്റെ സ്വദേശം.