ഇറ്റലിയിൽ ഡീസൽ വാഹനങ്ങൾക്ക് ഡ്രൈവിങ് നിരോധനം ഏർപ്പെടുത്താൻ സാധ്യത

റോം ∙ ‌അതിമനോഹരമായ തീരങ്ങളും, രുചികരമായ പാസ്തയും, 'മധുര ജീവിത'വും കൊണ്ട് സഞ്ചാരികളെ ആകർഷിക്കുന്ന ഇറ്റലിയിൽ ഡീസൽ വാഹനങ്ങൾക്ക് നിയന്ത്രണം വരുന്നു. ഗാർഡ തടാകം, മിലാൻ, വെനീസ് എന്നിവ ഉൾപ്പെടുന്ന വടക്കൻ ഇറ്റലിയിൽ ശരത്കാലം മുതൽ ഡീസൽ വാഹനങ്ങൾക്ക് ഡ്രൈവിങ് നിരോധനം ഏർപ്പെടുത്താൻ സാധ്യത. ജർമൻ സഞ്ചാരികൾക്ക് ഏറെ പ്രിയപ്പെട്ട ഈ യാത്രാ കേന്ദ്രത്തിലേക്കുള്ള യാത്രകൾ പുനഃക്രമീകരിക്കേണ്ടി വരും.

ഒക്ടോബറിൽ വടക്കൻ ഇറ്റലിയുടെ മിക്കവാറും എല്ലാ പ്രദേശങ്ങളിലും യൂറോ 5 നിലവാരം പാലിക്കാത്ത ഡീസൽ വാഹനങ്ങൾക്ക് പൂർണ്ണമായ ഡ്രൈവിങ് നിരോധനം വരും. പോ താഴ്‌വരയിലെ വായു മലിനീകരണം തടയുന്നതിനാണ് ഈ നടപടി. ജനസാന്ദ്രത, വ്യവസായം, ഭൂമിശാസ്ത്രപരമായ പ്രത്യേകതകൾ എന്നിവ കാരണം ഈ മേഖലയിൽ പൊടിപടലങ്ങൾ കൂടുതലായി കാണപ്പെടുന്നു.

ഡ്രൈവിങ് നിരോധനങ്ങളുടെ വ്യാപ്തിയും സമയപരിധിയും വ്യത്യാസപ്പെടുമെങ്കിലും, പുതിയ നിയന്ത്രണങ്ങൾ വടക്കൻ ഇറ്റലിയിലെ വലിയ പ്രദേശങ്ങൾക്ക് ബാധകമാകും.

∙ ലോംബാർഡി: ഒക്ടോബർ ഒന്ന് മുതൽ, ഡ്രൈവിങ് നിരോധനം സ്ഥിരമായി നിലവിൽ വരും - ദിവസവും രാവിലെ 7:30 മുതൽ വൈകുന്നേരം 7:30 വരെ. മിലാൻ, മോൺസ, ബ്രെസിയ, ബെർഗാമോ തുടങ്ങിയ നഗരങ്ങളും അവയുടെ പ്രാന്തപ്രദേശങ്ങളും ഈ നിയന്ത്രണത്തിൽ ഉൾപ്പെടും.

∙എമിലിയ-റൊമാഗ്ന: ഈ മേഖലയും സ്ഥിരമായ നിയന്ത്രണങ്ങൾ ഏർപ്പെടുത്താൻ സാധ്യതയുണ്ട്. ബൊളോണയ്ക്ക് ചുറ്റുമുള്ള പ്രദേശങ്ങളിലും 30,000ൽ അധികം ജനസംഖ്യയുള്ള പോ താഴ്‌വരയിലെ നഗരങ്ങളിലും ഒക്ടോബർ മുതൽ യൂറോ 5 ഡീസൽ വാഹനങ്ങൾക്ക് നിരോധനം വരും.

വെനെറ്റോ: വെറോണ, പാദുവ പോലുള്ള വലിയ നഗരങ്ങളിൽ 2025 ഒക്ടോബർ മുതൽ സ്ഥിരമായി ഡീസൽ നിരോധനം നടപ്പാക്കാൻ പദ്ധതിയിട്ടിരിക്കുന്നു.

∙പീഡ്‌മോണ്ട്: ഇവിടെ നിയന്ത്രണം കാലാനുസൃതമായിരിക്കും - ആദ്യമായി  ഒക്ടോബർ ഒന്ന് മുതൽ 2026 ഏപ്രിൽ 15 വരെയും, പിന്നീട് എല്ലാ വർഷവും ഒക്ടോബർ 15 മുതൽ ഏപ്രിൽ 15 വരെയും ഇത് ബാധകമാകും. ടൂറിൻ, ആസ്തി, അലസ്സാൻഡ്രിയ എന്നിവയുൾപ്പെടെ 30,000ൽ അധികം നിവാസികളുള്ള നഗരങ്ങളിൽ പ്രവൃത്തി ദിവസങ്ങളിൽ രാവിലെ 8:30 നും വൈകുന്നേരം 6:30 നും ഇടയിൽ യൂറോ 5 ഡീസൽ വാഹനങ്ങൾക്ക് നിരോധനമുണ്ടാകും.

ഈ നിരോധനം ലംഘിക്കുന്നവരിൽ നിന്ന് പിഴ ഈടാക്കും. ഇറ്റാലിയൻ വാഹന പോർട്ടലായ സിക്കുറാട്ടോയുടെ റിപ്പോർട്ട് അനുസരിച്ച്, പിഴ 168 യൂറോയാണ്. ആവർത്തിച്ചുള്ള നിയമലംഘനങ്ങൾ നടത്തിയാൽ ഡ്രൈവിങ് ലൈസൻസ് താൽക്കാലികമായി (15 മുതൽ 30 ദിവസം വരെ) റദ്ദാക്കിയേക്കാം.

ഭാവിയിൽ വടക്കൻ ഇറ്റലിയിലേക്ക് കാറിൽ യാത്ര ചെയ്യാൻ ഉദ്ദേശിക്കുന്നവർ അവരുടെ വാഹനം എല്ലായിടത്തും അനുവദനീയമാണോ എന്ന് മുൻകൂട്ടി പരിശോധിക്കണം. പ്രത്യേകിച്ച് പഴയ ഡീസൽ വാഹന ഉടമകൾ ഈ നിയന്ത്രണങ്ങൾക്ക് തയ്യാറെടുക്കുകയോ, ട്രെയിൻ, ഇലക്ട്രിക് കാർ അല്ലെങ്കിൽ വാടക വാഹനങ്ങൾ പോലുള്ള ബദൽ മാർഗ്ഗങ്ങൾ സ്വീകരിക്കുകയോ ചെയ്യേണ്ടിവരും.

ജർമനിയിലെ സ്ഥിതി ഇതിൽ നിന്ന് വ്യത്യസ്തമാണ്. അവിടെ നിലവിലുണ്ടായിരുന്ന ഡീസൽ ഡ്രൈവിങ് നിരോധനങ്ങൾ മിക്കവാറും പൂർണ്ണമായി പിൻവലിച്ചു. മ്യൂണിക്ക്, സ്റ്റുട്ട്ഗാർട്ട്, ഡാംസ്‌റ്റാഡ് എന്നിവിടങ്ങളിൽ മാത്രമാണ് ഇപ്പോഴും നിരോധനം ഭാഗികമായി നിലനിൽക്കുന്നത്. പുതിയ ഡ്രൈവിങ് നിരോധനങ്ങളെക്കുറിച്ചുള്ള ഭീഷണികൾ നിലവിൽ ജർമനിയിൽ ഇല്ല.