തണുക്കാൻ വെള്ളം വേണം, വൈദ്യുതിയും
Mail This Article
കുവൈത്ത് സിറ്റി ∙ ചൂട് കൂടുന്നതിനനുസരിച്ച് ശുദ്ധജലത്തിൻറെ ഉപയോഗവും വർധിച്ചു. ബുധനാഴ്ച രാജ്യം ഉപയോഗിച്ചത് 469 ദശലക്ഷം ഇംപീരിയൽ ഗ്യാലൻ വെള്ളമാണ്. പ്രതിദിന ഉത്പാദനമാകട്ടെ 456.31 ദശലക്ഷം ഗ്യാലൻ വെള്ളവും. ഇതോടെ കരുതൽ ജലം ഉപയോഗിക്കേണ്ടി വന്നു. അതേസമയം, ബുധനാഴ്ച വൈദ്യുതി ഉപയോഗത്തിൽ അൽപം കുറവുണ്ടായി. ചൊവ്വാഴ്ച 14,360 മെഗാവാട്ട് വൈദ്യുതി ഉപയോഗിച്ചിടത്ത് ബുധനാഴ്ച 13900 മെഗാവാട്ട് ആയിരുന്നു ഉപയോഗം. താപനിലയിലുണ്ടായ വ്യത്യാസമാണ് കാരണം.
വൈദ്യുതിയുടെയും വെള്ളത്തിന്റെയും ഉപയോഗം സ്മാർട് സംവിധാനം വഴി നിയന്ത്രിക്കുന്നത് വ്യാപകമാക്കണമെന്ന നിർദേശം ശക്തമായിട്ടുണ്ട്. 2 വർഷം മുൻപ് പള്ളികളിൽ ഏർപ്പെടുത്തിയ സ്മാർട് സംവിധാനം വിജയകരമായിരുന്നു. ഇതു വ്യാപിപ്പിക്കാൻ വാണിജ്യ-വ്യവസായ മന്ത്രാലയം ആവശ്യമായ പദ്ധതികൾ ആവിഷ്കരിക്കണമെന്നാണ് ആവശ്യം. അതേസമയം, ജൂൺ 1ന് നിലവിൽ വന്ന പുറം ജോലിക്കാർക്കുള്ള ഉച്ചവിശ്രമം ലംഘിച്ചത് സംബന്ധിച്ച് ഇതുവരെ 50 പരാതികൾ ലഭിച്ചതായി മാൻപവർ അതോറിറ്റി അറിയിച്ചു. നിയമലംഘനം കണ്ടെത്തിയാൽ 55643333 എന്ന നമ്പറിൽ അറിയിക്കണമെന്ന് അധികൃതർ അഭ്യർഥിച്ചു.