മികവിന്റെ മധുരമുള്ള പ്രമേഹ ഗവേഷണത്തിന് ഹമദ്

ദോഹ ∙ മേഖലയിലെ ഏറ്റവും വലിയ പ്രമേഹ ഗവേഷണ പദ്ധതിക്കു തയാറെടുത്തു ഹമദ് മെഡിക്കൽ കോർപറേഷൻ (എച്ച്എംസി). ഖത്തർ ഫൗണ്ടേഷന്റെ ഖത്തർ നാഷനൽ റിസർച്ച് ഫണ്ടിന്റെ പഞ്ചവത്സര പദ്ധതിയാണിത്. എച്ച്എംസിയുടെ സാമ്പത്തിക പിന്തുണയും പദ്ധതിക്കുണ്ട്. അക്കാദമിക് ഹെൽത്ത് സംവിധാനം വഴിയാണു പദ്ധതി. രാജ്യത്തെ ജനസംഖ്യയിൽ 17 ശതമാനം പേരും പ്രമേഹ ബാധിതരാണ്.

പ്രമേഹത്തെ പ്രതിരോധിക്കാനുള്ള മികച്ച മാർഗങ്ങൾ കണ്ടെത്തുകയാണു ഗവേഷണ പദ്ധതിയുടെ ലക്ഷ്യം. ടൈപ്പ്-2 പ്രമേഹത്തിലേക്ക് എത്താതെ പ്രീ-ഡയബറ്റിക് അവസ്ഥയെ പ്രതിരോധിക്കുക തുടങ്ങി പ്രമേഹവുമായി ബന്ധപ്പെട്ട ഏഴോളം ഉപ വിഷയങ്ങളിലാണു ഗവേഷണം.പൊതുജനാരോഗ്യ മന്ത്രാലയത്തിന്റെ ദേശീയ പ്രമേഹ നയത്തിനെ പിന്തുണയ്ക്കുന്നതാണു പദ്ധതി.