ഖത്തർ– ഇന്ത്യ ഹാൻഡ്ബോൾ മൽസരം ഇന്ന്

ദോഹ∙ 2020 ടോക്കിയോ ഒളിംപിക് ഗെയിംസിലേക്കുള്ള യോഗ്യതാ മത്സരത്തിൽ ഖത്തർ ഹാൻഡ്ബാൾ ടീം ഇന്ന് ഇന്ത്യയെ നേരിടും. വ്യാഴാഴ്ച അൽ ദുഹെയ്ൽ ഇൻഡോർ അരീനയിൽ ഹോങ്കോങ്ങുമായുള്ള പോരാട്ടത്തിൽ ഖത്തർ വിജയം നേടിയിരുന്നു (സ്‌കോർ 49-14). ഇതേ വേദിയിൽ സൗദി അറേബ്യ ഇന്ത്യയെ പരാജയപ്പെടുത്തി.

സ്‌കോർ 35-24. 2 ഗ്രൂപ്പുകളിലായി 8 ടീമുകളാണു ടോക്കിയോയിലേക്കു യോഗ്യത നേടാൻ ഏറ്റുമുട്ടുന്നത്. ഗ്രൂപ്പ് എയിൽ ഇന്ത്യ, സൗദി അറേബ്യ എന്നിവർക്കൊപ്പമാണു ഖത്തർ ടീം. ഗ്രൂപ്പ് ബിയിൽ ബഹ്‌റൈൻ, സൗത്ത് കൊറിയ, ഇറാൻ, കുവൈത്ത് എന്നീ ടീമുകളാണ്. ഇന്ന് ഇന്ത്യയുമായും തിങ്കളാഴ്ച സൗദിയുമായാണു ഖത്തറിന്റെ മത്സരം. ഇത് രണ്ടാം തവണയാണ് ഒളിംപിക് ഗെയിംസിലേക്കുള്ള ഏഷ്യൻ പുരുഷ ഹാൻഡ്ബാൾ യോഗ്യത മത്സരങ്ങൾക്ക് ഖത്തർ വേദിയാകുന്നത്.