പ്രാദേശിക കാർഷിക വിളകളുമായി ടോർബ വിപണി

ദോഹ ∙ പ്രാദേശിക ഫാമുകളുടെ കാർഷിക വിളകളുമായി ഖത്തർ ഫൗണ്ടേഷനിലെ ടോർബ കർഷക വിപണിക്ക് 16ന് തുടക്കമാകും. തുടർച്ചയായി മൂന്നാം വർഷമാണ് ടോർബ വിപണി തുറക്കുന്നത്. ഇത്തവണ ശനിയാഴ്ചകളിൽ മാത്രമായിരിക്കും വിപണിയുടെ പ്രവർത്തനം. രാവിലെ 8 മുതൽ രാത്രി 8 വരെ വിപണി സജീവമായിരിക്കും. പ്രാദേശിക ഭക്ഷ്യ ഉൽപാദകരെയും കർഷകരെയും പിന്തുണയ്ക്കാൻ ലക്ഷ്യമിട്ടാണ് ടോർബയുടെ പ്രവർത്തനം.

പച്ചക്കറികൾ, പഴങ്ങൾ, വീടുകളിൽ നിർമിച്ച ഉൽപന്നങ്ങൾ, സിറപ്പുകൾ, കരകൗശല ഉൽപന്നങ്ങൾ തുടങ്ങി വൈവിധ്യമാർന്ന വിപണിയാണ് തുറക്കുന്നത്. വീടുകളിൽ കൃഷി നടത്തുന്നവരെയും ടോർബ പിന്തുണക്കുന്നുണ്ട്. വീടുകളിൽ ഉൽപാദിപ്പിച്ചവ മാത്രമാണ് പരിഗണിക്കുന്നത്. 5 മുതൽ 12 വരെ പ്രായമുള്ളവർക്കായി ടോർബ ജൂനിയർ വിഭാഗവും ഉണ്ടാകും. കുട്ടികളുടെ സംരഭകത്വ കഴിവുകൾ വികസിപ്പിക്കുകയാണ് ലക്ഷ്യം.