കോവിഡ്-19 വിവരങ്ങള്‍ ജനങ്ങളിലേക്ക്; പുതിയ വെബ്പേജുമായി ജിസിഒ

ദോഹ ∙ കോവിഡ്-19 വിവരങ്ങള്‍ യഥാസമയം ജനങ്ങളിലേക്ക് എത്തിക്കാന്‍ ഗവണ്‍മെന്റ് കമ്യൂണിക്കേഷന്‍ ഓഫിസ് (ജിസിഒ) പുതിയ വെബ് പേജ് ആരംഭിച്ചു. കോവിഡ്-19 നെതിരെ രാജ്യം സ്വീകരിച്ച നടപടികള്‍, രാജ്യത്തെ രോഗബാധിതരുടെ എണ്ണം, സ്വീകരിക്കേണ്ട മുന്‍കരുതല്‍ നടപടികള്‍ എന്നിവയെല്ലാം സംബന്ധിച്ചുള്ള വിവരങ്ങളാണ് കോവിഡ്-19 എന്ന വെബ് പേജിലുള്ളത്. https://www.gco.gov.qa/en/focus/covid-19 എന്നതാണ് വെബ് പേജ്. 

പൊതുജനാരോഗ്യ മന്ത്രാലയത്തിന്റെ ഔദ്യോഗിക വെബ്‌സൈറ്റില്‍ കോവിഡ്-19 എന്ന വെബ്‌പേജ് നേരത്തെ തന്നെ ആരംഭിച്ചിട്ടുണ്ട്. https:www.moph.gov.qa/english/Pages/Coronavirus2019.aspx എന്ന പേജില്‍ മലയാളം, ഇംഗ്ലീഷ്, അറബിക്, ഹിന്ദി ഭാഷകളില്‍ വിവരങ്ങള്‍ ലഭ്യമാണ്. വൈറസ് സംബന്ധമായ വിവരങ്ങളെക്കുറിച്ച് കൃത്യമായ വിവരങ്ങള്‍ ജനങ്ങളിലേക്ക് എത്തിക്കാന്‍ ലക്ഷ്യമിട്ടാണ് വെബ്‌പേജുകള്‍. 

വ്യാജ വാര്‍ത്തകളില്‍ ജനങ്ങള്‍ ആശങ്കപ്പെടാതിരിക്കാനുള്ള മുന്‍കരുതല്‍ കൂടിയാണിത്. കോവിഡ്-19 സംബന്ധിച്ച അന്വേഷണങ്ങള്‍ക്കും സംശയങ്ങള്‍ക്കും 16000 എന്ന ടോള്‍ ഫ്രീ ഹോട്‌ലൈനും 24 മണിക്കൂറും സജീവമാണ്.