രോഗബാധിതരുടെ എണ്ണത്തിൽ കുറവ്; 40 ലക്ഷത്തിലേറെ പേർക്കു കോവിഡ് പരിശോധന നടത്തി യുഎഇ

അബുദാബി ∙ യുഎഇയിൽ 40 ലക്ഷത്തിലേറെ പേർക്കു കോവിഡ് പരിശോധന പൂർത്തിയാക്കിയതായി ആരോഗ്യമന്ത്രാലയം.

കോവിഡ് പരിശോധനയ്ക്കും നിരീക്ഷണത്തിനുമായി ലോകോത്തര സംവിധാനം ഏർപ്പെടുത്തിയതിലൂടെയാണു കുറഞ്ഞ സമയം കൊണ്ടു ഈ നേട്ടം കൈവരിക്കാനായതെന്നും അറിയിച്ചു. 2 മാസത്തിനകം 20 ലക്ഷം പേർക്കുകൂടി പരിശോധന നടത്തുകയാണു ലക്ഷ്യം.

ഇതിനായാണു ജനവാസ മേഖലകളിൽ വീടുകൾ തോറും കയറി സൗജന്യ പരിശോധന നടത്തിവരുന്നത്. അബുദാബി നഗരത്തിലെ ബഹുനില കെട്ടിടങ്ങളിലെ പരിശോധന ഏതാണ്ട് പൂർത്തിയായി. തുടർന്ന് ഇതര ഭാഗങ്ങളിലേക്കും വ്യാപിപ്പിച്ചിരിക്കുകയാണ്.

തൊഴിലാളികൾക്കും സൗജന്യ പരിശോധന നടത്തിയിരുന്നു. വ്യാപക പരിശോധനയും മികച്ച ചികിത്സയും മൂലം ഇപ്പോൾ രോഗബാധിതരുടെയും മരണപ്പെടുന്നവരുടെയും എണ്ണം കുറയുകയും രോഗമുക്തരുടെ എണ്ണം കൂടുകയും ചെയ്തുവരുന്നു.