യുഎഇയിൽ 24 മണിക്കൂറിനിടെ 1,311 പേർക്ക് കൂടി കോവിഡ്

അബുദാബി∙ യുഎഇയിൽ കഴിഞ്ഞ 24 മണിക്കൂറിനിടെ 1,311 പേർക്ക് കൂടി കോവിഡ്19 സ്ഥിരീകരിച്ചതായി ആരോഗ്യ–രോഗ പ്രതിരോധ മന്ത്രാലയം അറിയിച്ചു. 793 പേർ രോഗമുക്തി നേടുകയും ഒരാൾ മരിക്കുകയും ചെയ്തു. രാജ്യത്ത് ആകെ രോഗികൾ: 1,74,062. രോഗം ഭേദമായവർ–1,57,828. ചികിത്സയിൽ ഉള്ളത്: 15,648. 

ആകെ പരിശോധന: 17.1 ദശലക്ഷം

രാജ്യത്ത് 1,13,928 പേർക്ക് കൂടി പുതുതായി പരിശോധന നടത്തിയതായും ഇതോടെ ആകെ പരിശോധന 17.1 ദശലക്ഷം ആയതായും അധികൃതർ പറഞ്ഞു. 

കോവിഡ് സുരക്ഷാ മുൻകരുതലുകൾ ശക്തമായി തുടരണം. ആരും നിയന്ത്രണങ്ങൾ മറികടക്കാൻ ശ്രമിക്കരുത്. പ്രതിരോധത്തിനായി അഹോരാത്രം പ്രവർത്തിക്കുന്ന മുന്നണിപ്പോരാളികളുടെ പ്രയത്നം പാഴാക്കരുതെന്നും അധികൃതരുടെ മുന്നറിയിപ്പ് നൽകി. ഇതിനകം വ്യക്തികളും സ്ഥാപനങ്ങളുമുൾപ്പെടെ ഒട്ടേറെ പേർക്ക് പിഴ ചുമത്തി. എല്ലാവരും സുരക്ഷാ മുൻകരുതലുകൾ പാലിക്കണം. 

സാമൂഹിക അകലം പാലിക്കുകയും കൂട്ടായ്മകളും സംഗമങ്ങളും ഒഴിവാക്കുകയും വേണമെന്നും നിർദേശിച്ചു. ഇല്ലെങ്കിലും ഇൗ മേഖലയിൽ പ്രവർത്തിക്കുന്ന ആരോഗ്യപ്രവർത്തകരുടെ പ്രയത്നത്തിന് ഫലമില്ലാതായിപ്പോകുമെന്ന് ആവർത്തിച്ച് വ്യക്തമാക്കി.  നിയമലംഘനങ്ങൾ ശ്രദ്ധയിൽപ്പെട്ടാൽ ദുബായ് കൺസ്യൂമർ ആപ്പ് വഴിയോ  600545555 എന്ന നമ്പരിലോ, Consumerrights.ae വെബ്സൈറ്റ് സന്ദർശിച്ചോ വിവരം അധികൃതരെ അറിയിക്കണം.