ചിത്രങ്ങളിലൂടെ റിപ്പബ്ലിക് ആവേശം ചൊരിഞ്ഞ് അജ്മാനിലെ വിദ്യാർഥികൾ
Mail This Article
അജ്മാൻ ∙ ഇന്ത്യയുടെ 72–ാം റിപ്പബ്ലിക് ദിനത്തിന് അജ്മാൻ അൽ അമീർ സ്കൂൾ വിദ്യാർഥികളുടെ സവിശേഷ ആദരം. പതാകയേന്തി മാതൃരാജ്യത്തെ അഭിവാദ്യം ചെയ്തും കർഷകസമരം വരെ വിഷയമാക്കി ചിത്രം വരച്ചുമാണ് ഈ ദിവസം അവിമരണീയമാക്കിയത്.
പഠനം ഓൺലൈനിൽ ആയതുകൊണ്ട് പതാക ഉയർത്തലും പരേഡും അസംബ്ളിയുമൊക്കെ നഷ്ടമായതിന്റെ ദുഃഖം ഇതുവഴി അകറ്റാൻ ശ്രമിക്കുകയാണ് കൊച്ചുകൂട്ടുകാർ.
അഭിരാമി, ആവണി, ശിവാനി, ഖൽഫാൻ എന്നീ വിദ്യാർഥികൾ തങ്ങളുടെ വരകളും വർണങ്ങളുംകൊണ്ട് ഇന്ത്യയെ ഓർത്തെടുക്കാൻ ശ്രമിക്കുകയാണ് ചെയ്യുന്നത്. നിയയും അദ്വികയും റബീബും ത്രിവർണ പതാകയെ അഭിവാദനം ചെയ്താണ് ദേശഭക്തി ഉള്ളിൽ ഉണർത്തുന്നത്.
കൂടാതെ, കെജി ക്ലാസിലെ കുട്ടികൾ പാട്ടൊരുക്കി. വലിയ ക്ലാസിലെ കുട്ടികൾ പീരിയോഡിക്, മോഡൽ പരീക്ഷകളുടെ ചൂടിലാണ്. പ്രിൻസിപ്പൽ എസ്.ജെ. ജേക്കബ്, വൈസ് പ്രിൻസിപ്പൽ നൗഷാദ് ഷംസുദ്ദീൻ, അക്കാദമിക് കോ ഒാർഡിനേറ്റർ സൈഫുദ്ദീൻ ഹംസ, കരിക്കുലം മേധാവി ലത വാരിയർ എന്നിവർ തലേന്നുതന്നെ റിപ്പബ്ലിക് ദിനാശംസകൾ നേർന്ന് കുട്ടികൾക്കിടയിൽ രാജ്യസ്നേഹ സ്മരണ ഉണർത്തിയിരുന്നു.
