ആത്മവിശ്വാസത്തോടെ വിദ്യാർഥികൾ ഇന്ന് പരീക്ഷാഹാളിലേക്ക്

അബുദാബി∙ അവസാന വട്ട തയാറെടുപ്പുകൾ പൂർത്തിയാക്കി എസ്എസ്എൽസി വിദ്യാർഥികൾ ഇന്ന് പരീക്ഷാ ഹാളിലേക്ക്. മാർച്ചിൽ നടക്കേണ്ടിയിരുന്ന പരീക്ഷ തിരഞ്ഞെടുപ്പുമൂലം നീട്ടിവച്ചതിലൂടെ ലഭിച്ച അധിക സമയം ഉപയോഗപ്പെടുത്തിയതിന്റെ ആത്മവിശ്വാസത്തിലാണു വിദ്യാർഥികൾ. യുഎഇ സമയം ഉച്ചയ്ക്ക് 12.10ന് എസ്എസ്എൽസി മലയാളം/ അഡീഷണൽ പരീക്ഷയോടെയാണ് തുടക്കം.

നാളെ ഉച്ചയ്ക്ക് 1.10ന് ഹിന്ദി, തിങ്കളാഴ്ച 12.10ന് ഇംഗ്ലിഷ് പരീക്ഷയും കഴിഞ്ഞാൽ ബാക്കി പരീക്ഷകളെല്ലാം രാവിലെ 8.10നായിരിക്കും. ഹയർ സെക്കൻഡറിക്ക് ഇന്നു പരീക്ഷയില്ല. നാളെ രാവിലെ 8.10നു ബിസിനസ് സ്റ്റഡീസ്, കെമിസ്ട്രി പരീക്ഷകൾ നടക്കും.