ഈ വർഷം പത്ത് സ്വകാര്യ സ്കൂളുകൾ തുറക്കും

ദുബായ് ∙ 2021-2022 അധ്യയന വർഷത്തിൽ 10 സ്വകാര്യ സ്കൂളുകൾ കൂടി തുറക്കും. 

തിലാൽ അൽ ഗാഫ്, അൽ വർഖ, കരാമ, ബർഷ, സിറ്റി വോക്, മിർദിഫ്, നാദ് അൽ ഷെബ, അൽ ഖവാനീജ്, റാഷിദിയ എന്നിവിടങ്ങളിൽ സ്കൂളുകൾ തുറക്കുന്നതോടെ ഏകദേശം 1,500 കുട്ടികൾക്ക് അധികമായി പ്രവേശനം നൽകാനാകുമെന്നു നോളജ് ആൻഡ് ഹ്യൂമൻ ഡവലപ്മെന്റ് അതോറിറ്റി (കെഎച്ച്ഡിഎ) പെർമിറ്റ് വകുപ്പ് തലവൻ മുഹമ്മദ് അഹമ്മദ് ദർവീശ് അറിയിച്ചു.ഓസ്ട്രേലിയൻ, യുകെ, യുഎസ്, ഐബി പാഠ്യപദ്ധതികളാകും ഇവിടെയുണ്ടാകുക. ആദ്യമായാണ് ഓസ്ട്രേലിയൻ സിലബസിന് അനുമതി നൽകിയത്. യുകെയിൽ 500 വർഷത്തെ പ്രവർത്തന പാരമ്പര്യമുള്ള  റോയൽ ഗ്രാമർ സ്കൂൾ ഗിൽഡ്ഫോഡിന്റെ ശാഖയും അടുത്ത അധ്യയന വർഷമുണ്ടാകും. 3 വർഷത്തിനിടെ 25 സ്കൂളുകളാണ് തുറന്നത്. ദുബായിലെ സ്വകാര്യ സ്കൂളുകളിൽ 2,86,500 കുട്ടികൾ പഠിക്കുന്നതായാണു കണക്ക്.