മൂന്നു മാസത്തിനുള്ളിൽ ദുബായ് പൊലീസ് കൈകാര്യം ചെയ്തത് 12 ലക്ഷം ഫോൺ വിളികൾ
Mail This Article
ദുബായ്∙ കഴിഞ്ഞ മൂന്നു മാസത്തിനുള്ളിൽ ദുബായ് പൊലീസ് കൈകാര്യം ചെയ്തത് 12 ലക്ഷം ഫോൺ വിളികൾ. അടിയന്തര വിഭാഗമായ 999 ഹോട് ലൈനിലേയ്ക്ക് 1.17 ദശലക്ഷം വിളികളെത്തിയപ്പോൾ, അടിയന്തരമല്ലാത്ത കാര്യത്തിന് 901 നമ്പരിലേയ്ക്ക് 379,122 പേരും വിളിച്ചു.
10 സെക്കൻഡുകൾക്കകമാണ് 99.6% അടിയന്തര ആവശ്യങ്ങൾക്ക് മറുപടി പറഞ്ഞത്. അതേസമയം, കഴിഞ്ഞ വർഷം 1.09 ദശലക്ഷം അത്യാവശ്യ വിളികളായിരുന്നു പൊലീസിനെ തേടിയെത്തിയത്. വളരെ അടിയന്തരമായ സ്ഥലങ്ങളിലേയ്ക്ക് 2.33 മിനിറ്റ് കൊണ്ടായിരുന്നു പൊലീസ് ചീറിപ്പാഞ്ഞെത്തിയത്. സാധാരണഗതിയിൽ 6 മിനിറ്റ് കൊണ്ട് എത്തേണ്ട സ്ഥലങ്ങളാണിത്. 15 മിനിറ്റ് കൊണ്ട് എത്തേണ്ടിടങ്ങളിൽ 10.17 മിനിറ്റിനകം എത്തി. അരമണിക്കൂറോളമെടുത്ത് എത്തേണ്ട അടിയന്തരമല്ലാത്ത സ്ഥലങ്ങളിൽ പൊലീസ് പട്രോൾ സംഘം 10.45മിനിറ്റ് കൊണ്ടെത്തിയതായും അറിയിച്ചു. 901 എന്ന നമ്പരിലേയ്ക്കുള്ള അത്യാവശ്യമല്ലാത്ത 94.42 ഫോൺ വിളികൾക്ക് 20 സെക്കൻഡ് കൊണ്ട് മറുപടി പറഞ്ഞു.