സ്കുൾ തുറക്കലുമായി കുവൈത്ത് മുന്നോട്ട്

കുവൈത്ത് സിറ്റി∙രാജ്യത്തെ 900 സ്കൂളുകൾ സെപ്റ്റംബറിൽ പ്രവർത്തനത്തിനൊരുങ്ങുന്നു. കോവിഡ് പശ്ചാത്തലത്തിൽ ഒന്നര വർഷത്തിലേറെയായി പ്രവർത്തനം നിർത്തിവച്ച വിദ്യാലയങ്ങൾ സെപ്റ്റംബറിൽ പ്രവർത്തനം പുനരാരംഭിക്കുന്നതിന്റെ മുന്നോടിയായി സംവിധാനങ്ങളൊക്കെ ഒരുക്കി വരികയാണെന്ന് വിദ്യാഭ്യാസ മന്ത്രാലയത്തിലെ വിദ്യാഭ്യാസ സൗകര്യ-ആസൂത്രണ വിഭാഗം അസി.അണ്ടർ സെക്രട്ടറി യാസീൻ അൽ യാസീൻ അറിയിച്ചു. അറ്റകുറ്റപ്പണികളെല്ലാം  പൂർത്തീകരിക്കും. പൂർണമായും ആരോഗ്യ വകുപ്പിന്റെ നിയന്ത്രണങ്ങൾ പാലിച്ചാകും സ്കൂളുകൾ തുറക്കുക.

സ്കൂളുകൾ സെപ്റ്റംബറിൽ തുറക്കാൻ തീരുമാനമായെങ്കിലും പഠനം സംബന്ധിച്ച് 3 നിർദേശങ്ങളാണ് പരിഗണനയിലുള്ളത്. 100% കുട്ടികളും സ്കൂളിൽ എത്തുന്ന സംവിധാനം, 50% കുട്ടികൾ ഓൺ‌ലൈനായും 50% സ്കൂളിൽ എത്തിയും പഠനം, 100% കുട്ടികളും ഓൺ‌ലൈനിൽ തുടരൽ എന്നിവയാണ് അവർ. സാഹചര്യങ്ങൾ അടിസ്ഥാനപ്പെടുത്തിയാകും ഈ കാര്യത്തിൽ അന്തിമ തീരുമാനം. 

അതേസമയം പൊതുവിദ്യാലയങ്ങളിൽ അധ്യാപകക്ഷാമം ഇല്ലെന്ന് വിദ്യാഭ്യാസ മന്ത്രാലയം അസി.അണ്ടർസെക്രട്ടറി ഉസാമ അൽ സുൽത്താൻ പറഞ്ഞു. അക്കാര്യത്തിൽ ഉത്കണ്ഠയുടെ ആവശ്യം ഇല്ല. അടുത്ത ഒരുവർഷം സുഗമമായ പ്രവർത്തനങ്ങൾക്കുള്ള ക്രമീകരണങ്ങൾ സജ്ജമാണെന്നും അദ്ദേഹം പറഞ്ഞു.