വായനക്കാരന്റെ കൂടി പങ്കാളിത്തം ആവശ്യപ്പെടുന്ന കൃതിയാണ് 'കടലിന്റെ മണം': പി. എഫ്. മാത്യൂസ്   

ഷാർജ ∙ നിർണായകമായ നേരങ്ങളിൽ എടുക്കേണ്ടിവരുന്ന വേണമോ, വേണ്ടയോ എന്ന  തീരുമാനമാണ് പലപ്പോഴും മനുഷ്യരുടെ ജീവിതങ്ങളെ മാറ്റിമറിക്കുന്നത് എന്ന് എഴുത്തുകാരൻ  പി. എഫ് .മാത്യൂസ് പറഞ്ഞു. തന്റെ പുതിയ കൃതിയായ 'കടലിന്റെ മണം' എന്ന നോവലിനെ മുൻനിറുത്തി നടന്ന മുഖാമുഖം പരിപാടിയിൽ പ്രസംഗിക്കുകയായിരുന്നു അദ്ദേഹം. 

 മുൻകാല കൃതികളിൽ നിന്ന് വ്യത്യസ്തമായി 'കടലിന്റെ മണം' എന്ന നോവലിൽ താൻ സ്വീകരിച്ചിരിക്കുന്ന പുതിയ പ്രമേയത്തെയും പരിചയപ്പെടുത്തി. സാധാരണക്കാരനായ സച്ചിദാനന്ദൻ എന്ന മനുഷ്യന്റെ ഞെട്ടിപ്പിക്കുന്ന രൂപാന്തരങ്ങളാണ് നോവലിൽ പ്രതിപാദിക്കുന്നത്. സഫിയ എന്ന കഥാപാത്രത്തിന്റെ ജീവിതമൂല്യവിചാരങ്ങളും നോവൽ ചർച്ച ചെയ്യുന്നു.

ഈ വർഷത്തെ കേരള സാഹിത്യ അക്കാദമി അവാർഡ് ജേതാവും കുട്ടിസ്രാങ്ക്, ഈ മ യൗ തുടങ്ങിയ സിനിമകളുടെ തിരക്കഥാകൃത്തുമാണ് പി.എഫ്.മാത്യൂസ്. എഴുത്തുകാരി സോണിയ റഫീഖ് മോഡറേറ്ററായിരുന്നു.