എമിറേറ്റുകൾ സന്ദർശിച്ച് ജനങ്ങളുമായി കൂടിക്കാഴ്ച നടത്തി യുഎഇ പ്രസിഡന്റ്
Mail This Article
ദുബായ് ∙ ദുബായ് ഉൾപ്പെടെയുള്ള ഇതര എമിറേറ്റുകളിലെ പദ്ധതി മേഖലകളിൽ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ സന്ദർശനം നടത്തി. ഭരണാധികാരികളുമായും വടക്കൻ എമിറേറ്റുകളിലെ ജനങ്ങളുമായും അദ്ദേഹം കൂടിക്കാഴ്ച നടത്തി. പ്രസിഡന്റായി ചുമതലയേറ്റ ശേഷമുള്ള ആദ്യ സന്ദർശനമാണിത്.
1820 മുതലുള്ള ചരിത്രമുള്ള ദെയ്ദ് കോട്ട, പ്രമുഖ വിനോദസഞ്ചാര കേന്ദ്രം കൂടിയായ ഖോർഫക്കാൻ അൽ റഫീസ അണക്കെട്ട്, ഫുജൈറയിലെയും റാസൽഖൈമയിലെയും കാർഷിക-പൈതൃക മേഖലകൾ എന്നിവിടങ്ങൾ സന്ദർശിച്ചു.
പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ സ്വന്തം ക്യാമറയിൽ ചിത്രങ്ങൾ പകർത്തുകയും ജനങ്ങളുടെ തോളിൽ കൈയിട്ട് ഫോട്ടോയെടുക്കുകയും ചെയ്തു.
സ്ഥലങ്ങളിലെ സൗകര്യങ്ങൾ പരിശോധിക്കുകയും അതിന്റെ സേവനങ്ങളെയും വിനോദ ഘടകങ്ങളെയും കുറിച്ച് വിശദീകരിക്കുകയും ചെയ്തു.
ഷാർജ എമിറേറ്റിന്റെ പ്രദേശങ്ങളെ ബന്ധിപ്പിക്കുന്നതും ചരിത്രപരവും പ്രകൃതിദത്തവുമായ വിവിധ മേഖലകളിലൂടെ കടന്നുപോകുന്നതുമായ പുതിയ ഖോർഫക്കാൻ റോഡും അദ്ദേഹം സന്ദർശിച്ചു.
ഉപപ്രധാനമന്ത്രിയും പ്രസിഡൻഷ്യൽകാര്യ മന്ത്രിയുമായ ഷെയ്ഖ് മൻസൂർ ബിൻ സായിദ് അൽ നഹ്യാൻ, ഷെയ്ഖ് ഹംദാൻ ബിൻ മുഹമ്മദ് ബിൻ സായിദ് അൽ നഹ്യാൻ തുടങ്ങിയവരും അദ്ദേഹത്തോടൊപ്പമുണ്ടായിരുന്നു.