സൗദിയിൽ യുവാവ് അമ്മയെയും വേലക്കാരിയെയും ചുറ്റിക കൊണ്ട് അടിച്ചു കൊന്നു

മക്ക∙ മക്കയിൽ യുവാവ് മാതാവിനെയും വേലക്കാരിയെയും ചുറ്റിക കൊണ്ടു തലക്കടിച്ചു കൊന്നു. നാൽപതുകാരനായ സൗദി പൗരനാണു തന്റെ മാതാവിനെയും വീട്ടു ജോലിക്കാരിയെയും കഴിഞ്ഞ ദിവസം ക്രൂരമായി മർദിച്ചു കൊലപ്പെടുത്തിയത് .

മക്ക കാക്കിയ പൊലീസ് സ്റ്റേഷൻ പരിധിയിലാണു കൊലപാതകം. പ്രതി ലഹരി മരുന്നിന് അടിമയാണെന്നു പറയുന്നു. ചുറ്റിക കൊണ്ടു മാതാവിന്റെ തലയുടെ പിൻഭാഗത്ത് ഏറ്റ അടിയെ തുടർന്നു തലയോട്ടിയിൽ ദ്വാരം വീണിട്ടുണ്ട് . ഇതാണു മരണ കാരണമെന്നാണു റിപ്പോർട്ട്. വീട്ടുജോലിക്കാരിയുടെ മൃതദേഹം അടുക്കളയിൽ നിന്നും മാതാവിന്റെ മൃതദേഹം കിടപ്പുമുറിയിൽ നിന്നുമാണു കണ്ടെത്തിയത് .

ആക്രമണത്തിനിരയായ രണ്ടു പേരും സംഭവ സ്ഥലത്തു തന്നെ മരിച്ചിരുന്നു . കൃത്യത്തിനു ശേഷം പ്രതി തന്നെയാണു പൊലീസിൽ വിളിച്ചു സംഭവം അറിയിച്ചത് . താമസ കേന്ദ്രവും വിവരവും നൽകിയ ഇദ്ദേഹം ആംബുലൻസും ആവശ്യപ്പെട്ടിരുന്നു.

English Summary : Saudi youth beat his mother and maid to death with a hammer