യുഎഇ ദേശീയദിനം; മലയാളി നർത്തകിയുടെ അപൂർവ ആദരം

ദുബായ്∙ യുഎഇയുടെ 51–ാം ദേശീയദിനാഘോഷത്തിന് കൊഴുപ്പേകാൻ ദുബായിലെ മലയാളി നർത്തകിയുടെ നൃത്തശില്പം കൊണ്ടുള്ള ആദരം. 16 വർഷമായി ദുബായിൽ താമസിക്കുന്ന തൃശൂർ സ്വദേശി ദിൽന ദിനേഷാണ് നൃത്തം ഒരുക്കിയത്. ദുബായുടെ പ്രധാന മുദ്രകളിലൊന്നായ ബുർജ് അൽ അറബിന്റെ പശ്ചാത്തലത്തിൽ യുഎഇ ദേശീയഗാനത്തിനൊപ്പമാണ് ചതുർവർണ പതാകയുമേന്തി ദിൽന നൃത്തം ചെയ്തത്. ക്യാമറയും എഡിറ്റിിങ്ങും നിർവഹിച്ചത് പ്രജിത് പത്മനാഭൻ.

ദുബായിൽ വർണ നൃത്തകലാക്ഷേത്ര എന്ന നൃത്തവിദ്യാലയം നടത്തുന്ന ദിൽനയുടെ കീഴിൽ ഒട്ടേറെ വിദ്യാർഥികൾ ഭരതനാട്യം, മോഹിനിയാട്ടം, കുച്ചിപ്പുടി എന്നിവ അഭ്യസിച്ചിട്ടുണ്ട്.