ഹയാ കാർഡ്: അപേക്ഷാ നടപടികൾ പൂർണമെങ്കിൽ മാത്രം യാത്ര
Mail This Article
ദോഹ∙ ഹയാ കാർഡ് അപേക്ഷാ നടപടികൾ വിജയകരമായി പൂർത്തിയാക്കിയ ശേഷമേ ഖത്തറിലേക്ക് യാത്ര പുറപ്പെടാവൂ എന്ന് സുപ്രീം കമ്മിറ്റി ഫോർ ഡെലിവറി ആൻഡ് ലെഗസി അധികൃതർ. ഹയാ കാർഡും എൻട്രി പെർമിറ്റും കൈവശമുള്ളവരെ മാത്രമേ വ്യോമ, കര, സമുദ്ര മാർഗം ഖത്തറിലേക്ക് പ്രവേശിക്കാൻ അനുവദിക്കൂ.
മത്സര ടിക്കറ്റില്ലാത്തവർക്കും ഹയാ കാർഡ് മുഖേന ഖത്തറിലേക്ക് ഈ മാസം 2 മുതലാണ് പ്രവേശനം അനുവദിച്ചത്. ഹയാ കാർഡിനായി അപേക്ഷ നൽകുമ്പോൾ തന്നെ താമസവും സ്ഥിരീകരിക്കണം. തുടർന്ന് 500 റിയാൽ ഫീസ് അടയ്ക്കണം. അപേക്ഷാ നടപടികൾ വിജയകരമായി പൂർത്തിയാക്കുമ്പോൾ അപേക്ഷകന്റെ ഇ-മെയിലിൽ എൻട്രി പെർമിറ്റ് ലഭിക്കും.
അതിനു ശേഷമേ യാത്ര പാടുള്ളൂ. ഹയാ കാർഡ് ഉടമകൾക്ക് ലോകകപ്പ് ഫാൻ സോണുകളിൽ പ്രവേശിക്കാം. സ്റ്റേഡിയങ്ങളിലെ പ്രവേശനത്തിന് മത്സര ടിക്കറ്റ് വേണം. കാർഡ് ഉടമകൾക്ക് 2023 ജനുവരി 23 വരെ ഖത്തറിൽ താമസിക്കാം. ഹയാ കാർഡിനായി എന്ന https://hayya.qatar2022.qa/ വെബ് സൈറ്റിലൂടെയോ Hayya to Qatar 2022 എന്ന മൊബൈൽ ആപ്ലിക്കേഷൻ മുഖേനയോ അപേക്ഷ നൽകാം.