ദോഹ∙ ജൂലൈയിൽ ഹമദ് രാജ്യാന്തര വിമാനത്താവളത്തിലൂടെ കടന്നു പോയത് 4.3 ദശലക്ഷം യാത്രക്കാർ. 2022 ജൂലൈയിലേക്കാൾ 24.3 ശതമാനമാണ് വർധന. കഴിഞ്ഞ വർഷം ജൂലൈയിൽ 3.4 ദശലക്ഷമായിരുന്നു. യാത്രക്കാരുടെ എണ്ണത്തിൽ മാത്രമല്ല വിമാന നീക്കത്തിലും 20.1 ശതമാനമാണ് വാർഷിക വർധന. ജൂലൈയിൽ 22,598 വിമാനങ്ങളാണ് ഹമദ് വിമാനത്താവളത്തിൽ വന്നുപോയത്. മുൻവർഷം ഇതേ മാസം 18,812 ആയിരുന്നു വിമാനങ്ങളുടെ എണ്ണം. അതേസമയം കാർഗോ നീക്കത്തിൽ 1.2 ശതമാനം കുറവാണ് വാർഷികാടിസ്ഥാനത്തിലുള്ളത്. 

കഴിഞ്ഞ വർഷം ജൂലൈയിൽ 1,97,576 ടൺ ആയിരുന്നത് ഈ വർഷം 1,95,244 ടൺ ആയാണ് കുറഞ്ഞത്. 2022 ആദ്യ പകുതിയെ അപേക്ഷിച്ച് ഈ വർഷം ആദ്യ 2 പാദത്തിലും വ്യോമയാന മേഖലയിൽ ഗണ്യമായ വളർച്ചയാണുള്ളത്.

English Summary: 4.3 million passengers traveled through Hamad International Airport in July.