ദോഹ ∙ ഖത്തറിൽ എത്തിയ കെ.മുരളീധരൻ എംപിക്ക് പ്രവാസി പ്രശ്‌നങ്ങളുന്നയിച്ച് കൾചറൽ ഫോറം സംസ്ഥാന കമ്മിറ്റി നിവേദനം നൽകി.

ഇന്ത്യയിലെ വിമാനത്താവളങ്ങളിൽ ബാഗേജുകൾ പരിശോധിക്കാൻ നൂതന ശാസ്ത്രീയ സംവിധാനങ്ങൾ ഏർപ്പെടുത്തുക, വിമാന നിരക്ക് നിയന്ത്രിക്കാൻ  നിയമനിർമാണം നടത്തുക, കണ്ണൂർ രാജ്യാന്തര വിമാനത്താവളത്തിൽ വിദേശ വിമാന കമ്പനികൾക്ക് സർവീസ് നടത്താനായി 'പോയിന്റ് ഓഫ് കോൾ' പദവിയുടെ അനുമതിക്കായി കേന്ദ്രത്തിൽ സമ്മർദ്ദം ചെലുത്തുക തുടങ്ങിയ ആവശ്യങ്ങളാണ് നിവേദനത്തിലുള്ളത്. കൾചറൽ ഫോറം  വൈസ് പ്രസിഡന്റ്  റഷീദ് അലി,  ജനറൽ സെക്രട്ടറിമാരായ താസീൻ അമീൻ, അഹമദ് ഷാഫി, ട്രഷറർ ഷരീഫ് ചിറക്കൽ, സെക്രട്ടറി അബ്ദു റഹീം വേങ്ങേരി ,സംസ്ഥാന കമ്മിറ്റിയംഗങ്ങളായ  സജ്‌ന സാകി, സക്കീന അബ്ദുല്ല എന്നിവരാണ് എംപിയെ സന്ദർശിച്ചത്.