ബേക്കൽ സാലിഹാജി അന്തരിച്ചു; വിട പറഞ്ഞത് ഖത്തറിലെ മലയാളി വ്യവസായ പ്രമുഖൻ

ദോഹ∙ ഖത്തറിലെ ആദ്യകാല പ്രവാസിയും വ്യാപാര പ്രമുഖനുമായ ബേക്കൽ സാലിഹാജി ( സാലിച്ച ) (74 ) അന്തരിച്ചു . കാസർകോട്  ജില്ലയിലെ ഉദുമ നിയോജകമണ്ഡലത്തിലെ ബേക്കൽ സ്വദേശിയാണ് . കുറച്ചു കാലമായി  അസുഖത്തെ തുടർന്ന്  ചികിത്സയിലായിരുന്ന സാലിഹാജിക്ക്  ഇന്ന്  പുലർച്ചെ ഖത്തർ ഹമദ് ആശുപത്രിയിൽ വച്ചാണ് മരണം സംഭവിച്ചത് .

എഴുപതുകളിൽ കടൽ മാർഗം  ഖത്തറിലെത്തിയ സാലിഹാജി കഴിഞ്ഞ 54 വർഷമായി  ഖത്തറിലെ വസ്ത്ര  വ്യാപാര മേഖലയിലും  സാമൂഹിക രംഗത്തും  നിറസാന്നിധ്യമായിരുന്നു . ബോംബെ സിൽക്‌സ് , ലെക്സസ്  ടൈലറിം‌‌ങ് , സെഞ്ച്വറി ടെക്സ്റ്റയിൽസ്, പാണ്ട ഹൈപ്പർമാർക്കറ്റ്, ദാന സെന്‍റർ എന്നീ സ്ഥാപങ്ങളുടെ ചെയർമാൻ  ആയിരുന്നു . ചെറുപ്രായത്തിൽ തന്നെ ഖത്തറിലെത്തിയ സാലിഹാജി സ്വപ്രയത്നത്തിലൂടെ വ്യാപാര മേഖലയിൽ ശക്തമായ സാന്നിധ്യമായി മാറി .കെ എം സി സി  കാസർകോട് ജില്ല പ്രസിഡന്‍റ് , സംസ്ഥാന  ഉപദേശക സമിതി അംഗം  എന്നീ നിലകളിൽ  പ്രവർത്തിച്ചിരുന്നു .

ഭാര്യ  മുംതാസ് യു .വി. ഏകമകൾ  ജാഫ്നത്, ജാമാതാവ് മുഹമ്മദ് സമീർ ബദറുദ്ധീൻ. അലിഷ, ജിയ എന്നിവർ കൊച്ചുമക്കളാണ് . മൃതദേഹം  ഖത്തർ  അബൂഹമൂർ  ഖബർസ്ഥാനിൽ  ഇന്ന് രാത്രി ഏഴുമണിക്ക്  സംസ്കരിക്കുമെന്ന് ബന്ധപെട്ടവർ  അറിയിച്ചു . ഇന്ന്  മഗ്‌രിബ് നമ്സക്കനന്തരം  അബൂഹമൂർ  പള്ളിയിൽ  സാലി ഹാജിക്ക്  വേണ്ടിയുള്ള  മയ്യത്ത് നമസ്ക്കാരം  നടക്കും.