പ്രിൻസ് ഹുസാം പാർക്കിലേക്ക് വിനോദസഞ്ചാരികളുടെ പ്രവാഹം; പ്രവാസികൾക്കും പ്രിയങ്കരം

അൽ ബഹ ∙ സൗദിയിലെ അൽ ബഹ പ്രദേശത്തെ പ്രധാന വിനോദസഞ്ചാര ആകർഷണമാണ് പ്രിൻസ് ഹുസാം പാർക്ക്. 150,000 ചതുരശ്ര മീറ്ററിൽ വ്യാപിച്ചുകിടക്കുന്ന ഈ പാർക്ക് കുടുംബങ്ങളും വിനോദസഞ്ചാരികളും ഒരേപോലെ ഇഷ്ടപ്പെടുന്ന ഒരു സ്ഥലമാണ്. 80,000 ചതുരശ്ര മീറ്ററിലുള്ള ഹരിത ഇടങ്ങൾ, ഒരു കൃത്രിമ തടാകം, 1200 ചതുരശ്ര മീറ്ററുള്ള നടുമുറ്റം, 10 മീറ്റർ ഉയരമുള്ള വെള്ളച്ചാട്ടങ്ങൾ, ജലധാര എന്നിവ പാർക്കിനെ കൂടുതൽ ആകർഷകമാക്കുന്നു. 1400 മരങ്ങളും 4000 കുറ്റിച്ചെടികളും നിറഞ്ഞ ഈ പാർക്ക് ശുദ്ധവായു ശ്വസിക്കാനും പ്രകൃതിയോട് അടുക്കാനും വിനോദ സഞ്ചാരികൾക്ക് അവസരം നൽകുന്നു.

പ്രിൻസ് ഹുസാം പാർക്ക് എല്ലാ പ്രായക്കാർക്കും അനുയോജ്യമായ വിനോദ സാധ്യതകൾ പ്രദാനം ചെയ്യുന്നു. കുട്ടികൾക്കായി സുരക്ഷിതമായ കളിസ്ഥലങ്ങളും അമ്യൂസ്‌മെന്‍റ് പാർക്കുകളും ഉണ്ട്. മുതിർന്നവർക്ക് പ്രകൃതിയുടെ സൗന്ദര്യം ആസ്വദിക്കാനും സുഹൃത്തുക്കളുമായി സമയം ചിലവഴിക്കാനും അവസരമുണ്ട്. പാർക്കിലെ ട്രെയിൻ കാർ, ടെറസുകൾ, കടകൾ എന്നിവ വിനോദ സഞ്ചാരികൾക്ക് കൂടുതൽ ആസ്വാദ്യകരമായ അനുഭവം നൽകുന്നു.

പ്രിൻസ് ഹുസാം പാർക്ക്

ഈ പ്രദേശത്തെ തണുത്ത കാലാവസ്ഥയും മൂടൽമഞ്ഞും പാർക്കിന് ഒരു പ്രത്യേക ആകർഷണം നൽകുന്നു. ഹരിത ഇടങ്ങളിൽ പരക്കുന്ന മൂടൽമഞ്ഞ് പാർക്കിനെ ഒരു പറുദീസയായി മാറ്റുന്നു.1500 പേർക്ക് ഇരിക്കാവുന്ന ടെറസുകൾ, 500 പാർക്കിങ് സ്ഥലങ്ങൾ, സ്ത്രീകൾക്കും പുരുഷന്മാർക്കും വേണ്ടിയുള്ള പ്രാർഥനാമുറി,വിവിധ ഭക്ഷണശാലകളും കടകളും .സുരക്ഷിതമായ കളിസ്ഥലങ്ങൾ എന്നിവ എല്ലാം പാർക്കിനെ സ്വദേശികൾക്ക് എന്ന പോലെ പ്രവാസികൾക്കും പ്രിയങ്കരമാക്കുന്നു.