മൂന്നാമത് ബൈക്ക് അബുദാബി ഗ്രാൻ ഫോണ്ടോ നവംബർ 16 ന്

അബുദാബി∙ അബുദാബി സ്‌പോർട്‌സ് കൗൺസിൽ സംഘടിപ്പിക്കുന്ന മൂന്നാമത് ബൈക്ക് അബുദാബി ഗ്രാൻ ഫോണ്ടോ 2024 നവംബർ 16 ന് നടക്കും. സൈക്ലിങ് റേസ്‌കോഴ്‌സ് അബുദാബിയിൽ തുടങ്ങി അൽ ഐനിൽ അവസാനിക്കുന്ന 150 കിലോമീറ്റർ റൂട്ട് ഉൾക്കൊള്ളുന്നതാണ് മത്സരം. അബുദാബി ഗ്രാൻ ഫോണ്ടോ മൂന്നാം പതിപ്പിനുള്ള ആകെ സമ്മാനത്തുക 2 ദശലക്ഷം ദിർഹം ആണ്. യുഎഇയിലെ ഏറ്റവും പ്രമുഖ കായിക ഇനങ്ങളിലൊന്നായി മാറിയ മത്സരം ലോകോത്തര സൈക്ലിങ് ഇവന്‍റുകൾ സംഘടിപ്പിക്കുന്നതിനുള്ള അബുദാബിയുടെ ശ്രമങ്ങളെ പിന്തുണയ്ക്കുന്നു. 

നൂറുകണക്കിന് പേരുടെ ആവേശകരമായ പങ്കാളിത്തം സൈക്ലിങ്ങിന്‍റെ പ്രാധാന്യവും ജനസംഖ്യയുടെ പൊതു ആരോഗ്യം മെച്ചപ്പെടുത്തുന്നതിൽ അതിന്‍റെ പങ്കും ഉയർത്തിക്കാട്ടുന്നുവെന്ന്  അബുദാബി സ്‌പോർട്‌സ് കൗൺസിൽ ജനറൽ സെക്രട്ടറി അരീഫ് ഹമദ് അൽ അവാനി പറഞ്ഞു. ബൈക്ക് അബുദാബി ഗ്രാൻ ഫോണ്ടോ സൈക്ലിങ് ആരാധകർക്ക് വേറിട്ട അനുഭവം പ്രദാനം ചെയ്യുന്നു. 

അബുദാബിയിലെ വിവിധ മേഖലകളിലൂടെ കടന്നുപോകുന്ന ഒരു നീണ്ട ട്രാക്കിൽ അമേച്വർ, പ്രഫഷനൽ സൈക്ലിസ്റ്റുകളെ ഒരുമിച്ചു കൊണ്ടുവരുന്നു. യുഎഇക്കകത്തും പുറത്തും താമസിക്കുന്ന 75 രാജ്യങ്ങളെ പ്രതിനിധീകരിച്ച് 2023-ലെ അവസാന പതിപ്പിൽ പങ്കെടുത്തവരുടെ എണ്ണം 1,200 ആയി ഉയർന്നതോടെ ഗ്രാൻ ഫോണ്ടോ സൈക്കിൾ യാത്രികരുടെയും പുരുഷന്മാരുടെയും സ്ത്രീകളുടെയും മികച്ച കമ്മ്യൂണിറ്റി പങ്കാളിത്തം അനുഭവിച്ചിട്ടുണ്ട്.  

അബുദാബി ഗ്രാൻ ഫോണ്ടോ ഒരു ഓട്ടം മാത്രമല്ല, സൈക്ലിങ്ങിന്‍റെയും സമൂഹത്തിന്‍റെ ഐക്യത്തിന്‍റെയും ആഘോഷമാണ്. അതിന്‍റെ ആത്യന്തിക ലക്ഷ്യം ശാരീരിക ക്ഷമത നിലനിർത്തുന്നതിനും ആരോഗ്യകരമായ ജീവിതശൈലി പിന്തുടരുന്നതിനും സമൂഹത്തിന്‍റെ ജീവിത നിലവാരം മെച്ചപ്പെടുത്തുന്നതിനും പ്രോത്സാഹിപ്പിക്കുക എന്നതാണ്. സൈക്ലിങ് മേഖലയിൽ ആഗോള സ്ഥാനം ഉറപ്പിക്കുക എന്ന എമിറേറ്റിന്‍റെ ദീർഘകാല ലക്ഷ്യങ്ങൾ കൈവരിക്കുന്നതിനുള്ള ഏകീകൃത ശ്രമങ്ങൾ ലക്ഷ്യമിട്ട് അബുദാബി സർക്കാർ ആരംഭിച്ച  സംരംഭമാണ് ബൈക്ക് അബുദാബി. സൈക്ലിങ്ങിനെ പ്രോത്സാഹിപ്പിക്കുന്ന തന്ത്രങ്ങൾ നടപ്പിലാക്കുന്നതിനുള്ള ദീർഘകാല പ്രതിബദ്ധത കണക്കിലെടുത്ത് 2021 നവംബറിൽ ഇന്‍റർനാഷനൽ സൈക്ലിങ് യൂണിയൻ അബുദാബിയെ "ബൈക്ക് സിറ്റി" ആയി പ്രഖ്യാപിച്ചിരുന്നു.