ഇന്ത്യൻ സ്കൂൾ പ്ലാറ്റിനം ജൂബിലി ആഘോഷങ്ങൾ 23ന് ആരംഭിക്കും

മനാമ ∙ ഇന്ത്യൻ സ്‌കൂൾ ബഹ്‌റൈന്റെ പ്ലാറ്റിനം ജൂബിലി ആഘോഷങ്ങൾക്ക് 23നു തുടക്കമാവും. ഒരു വർഷം നീണ്ടുനിൽക്കുന്ന ആഘോഷങ്ങളുടെ ഉദ്ഘാടന പരിപാടി സ്‌കൂളിന്റെ ഇസ ടൗൺ ക്യാംപസിലെ ജഷന്മാൾ ഓഡിറ്റോറിയത്തിലാണ് നടക്കുക.

പ്ലാറ്റിനം ജൂബിലി ലോഗോയുടെ അനാച്ഛാദനം ചടങ്ങിൽ നടക്കും. ആഘോഷങ്ങളുടെ ഭാഗമായി വിദ്യാർഥികളെയും രക്ഷിതാക്കളെയും അധ്യാപകരെയും പൂർവ വിദ്യാർഥികളെയും ഒരുമിച്ച് കൊണ്ടുവരാനാണ് പദ്ധതിയിടുന്നത്. മുൻ ചെയർമാൻ പ്രിൻസ് എസ് നടരാജന്റെയും കമ്മ്യൂണിറ്റി നേതാവ് മുഹമ്മദ് ഹുസൈൻ മാലിമിന്റെയും നേതൃത്വത്തിലുള്ള കമ്മിറ്റിയാണ് ജൂബിലി ആഘോഷങ്ങൾക്ക് ചുക്കാൻ പിടിക്കുന്നത്. 

18 രാജ്യങ്ങളിലെ വൈവിധ്യമാർന്ന സാംസ്കാരിക പശ്ചാത്തലങ്ങളിൽ നിന്നുള്ള ആയിരക്കണക്കിന് വിദ്യാർഥികൾക്ക് സ്‌കൂളിൽ പഠിക്കുന്നുണ്ടെന്ന് സ്‌കൂൾ ചെയർമാൻ അഡ്വ. ബിനു മണ്ണിൽ വറുഗീസ് പറഞ്ഞു. ഇന്ത്യയിലെ എല്ലാ സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമുള്ള വിദ്യാർഥികളും വിവിധ ദേശീയതകളിൽ നിന്നുള്ള കുട്ടികളും സ്‌കൂളിന്റെ ആഗോള കാഴ്ചപ്പാടിനെ പ്രതിഫലിപ്പിക്കുന്നതായി അദ്ദേഹം പറഞ്ഞു. സ്‌കൂളിന്റെ ചരിത്രത്തെയും സമൂഹത്തിൽ അതിന്റെ സ്വാധീനത്തെയും ആദരിക്കുന്നതിനായി രൂപകൽപ്പന ചെയ്‌തിരിക്കുന്ന പരിപാടികളാണ് നടക്കുക. 

ഗൾഫിലുടനീളമുള്ള 75 സ്‌കൂളുകളിൽ നിന്നുള്ള വിദ്യാർഥികൾ അവരുടെ കലാപരമായ കഴിവുകൾ പ്രദർശിപ്പിക്കുന്നതിനായി ഇസ ടൗൺ ക്യാംപസിൽ ഒത്തുകൂടുന്ന ആലേഖ് പെയിന്റിംഗ് മത്സരമായിരിക്കും ഒരു പ്രധാന ആകർഷണം. ചിത്രരചനാ മത്സരത്തിന് പുറമേ, കലാപരവും സാഹിത്യപരവുമായ ആവിഷ്കാരത്തെ പ്രോത്സാഹിപ്പിക്കുന്ന നിരവധി ശില്പശാലകളും മത്സരങ്ങളും സ്കൂൾ സംഘടിപ്പിക്കും. സർഗാത്മക രചനാ മത്സരങ്ങൾ, പോസ്റ്റർ ഡിസൈൻ മത്സരങ്ങൾ, വിദ്യാഭ്യാസ മേഖലയിലെ ഏറ്റവും പുതിയ പ്രവണതകളെക്കുറിച്ച് ചർച്ച ചെയ്യുന്നതിനായി പ്രമുഖ അധ്യാപകരെയും വിദഗ്ധരെയും ഒരുമിച്ച് കൊണ്ടുവരുന്ന ഒരു വിദ്യാഭ്യാസ കോൺക്ലേവ് എന്നിവ ഇതിൽ ഉൾപ്പെടും. ഇന്ത്യൻ സംസ്കാരത്തിന്റെ മുഖമുദ്രയായ ഭാഷാ വൈവിധ്യം പ്രദർശിപ്പിക്കുന്ന 75 ഭാഷകളിലായി ഒരു അതുല്യമായ പുസ്തക പ്രദർശനത്തോടുകൂടിയ സാഹിത്യോത്സവവും ആഘോഷങ്ങളിൽ ഉൾപ്പെടും. 

നാഷനൽ സ്റ്റേഡിയത്തിൽ നടക്കുന്ന റെക്കോർഡ് നൃത്ത പ്രകടനമായിരിക്കും ഏറ്റവും പ്രതീക്ഷ നൽകുന്ന പരിപാടികളിൽ ഒന്ന്. ഇന്ത്യയുടെ സാംസ്കാരിക സമ്പന്നതയെ പ്രതിനിധീകരിക്കുന്ന 75 വ്യത്യസ്ത നൃത്തരൂപങ്ങൾ വിദ്യാർഥികൾ അവതരിപ്പിക്കും. പൂർവ വിദ്യാർഥികളെ സ്കൂളുമായി വീണ്ടും ബന്ധിപ്പിക്കാൻ ലക്ഷ്യമിട്ടുള്ള ഒരു ആഗോള പൂർവ വിദ്യാർഥി സംഗമവും ഉണ്ടായിരിക്കും. ഈ ഒത്തുചേരലിൽ പൂർവ വിദ്യാർഥികൾക്ക് അവരുടെ അനുഭവങ്ങൾ പങ്കിടാനും, സ്കൂളിന്റെ ഭാവി വളർച്ചയ്ക്ക് സംഭാവന നൽകാനും, സ്ഥാപനവുമായുള്ള ബന്ധം ശക്തിപ്പെടുത്താനുമുള്ള അവസരം ലഭിക്കും. ലോകമെമ്പാടുമുള്ള പൂർവ വിദ്യാർഥികൾക്ക് പരിപാടിയിൽ പങ്കെടുക്കാൻ ഗൂഗിൾ ഫോം വഴി റജിസ്റ്റർ ചെയ്യാം. തുടർച്ചയായ വളർച്ചയ്ക്കുള്ള പ്രതിബദ്ധതയ്ക്ക് അനുസൃതമായി, സ്‌കൂൾ ക്യാംപസിൽ അടിസ്ഥാന സൗകര്യ വികസന പദ്ധതികളും ഏറ്റെടുക്കും. പ്ലാറ്റിനം ജൂബിലി ആഘോഷങ്ങളിൽ പങ്കുചേരാൻ ഏവരെയും ക്ഷണിക്കുന്നതായി സ്‌കൂൾ അധികൃതർ പറഞ്ഞു.