ചരിത്രപരമായ നാഴികക്കല്ല്: 2024ൽ യുഎഇയുടെ വിദേശ വ്യാപാരം മൂന്ന് ട്രില്യൻ ദിർഹം

അബുദാബി ∙ 2024 അവസാനത്തോടെ യുഎഇയുടെ വിദേശ വ്യാപാരം 3 ട്രില്യൻ ദിർഹത്തിലെത്തിയതായി വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം ഇന്ന് പ്രഖ്യാപിച്ചു. ഈ സാമ്പത്തിക നേട്ടത്തെ "ചരിത്രപരമായ നാഴികക്കല്ല്" എന്ന് അദ്ദേഹം എക്സ് പ്ലാറ്റ്ഫോമിലെ പോസ്റ്റിൽ പറഞ്ഞു. 

2024-ൽ ആഗോള വ്യാപാരം വെറും 2 ശതമാനം മാത്രം വളർന്നപ്പോൾ യുഎഇയുടെ വിദേശ വ്യാപാരം അതിന്റെ ഏഴ് മടങ്ങ് വർധിച്ച്, 14.6 ശതമാനം വളർച്ച കൈവരിച്ചുവെന്ന് അദ്ദേഹം കുറിച്ചു. ഈ വിജയത്തിന്റെ ഭൂരിഭാഗവും പ്രസിഡൻ്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ വർഷങ്ങളുടെ പ്രയത്നഫലമാണ്. 

ഷെയ്ഖ് മുഹമ്മദിന്റെ നേതൃത്വത്തിലുള്ള സമഗ്ര സാമ്പത്തിക പങ്കാളിത്ത കരാറുകൾ, പങ്കാളി രാജ്യങ്ങളുമായുള്ള എണ്ണ ഇതര വ്യാപാരത്തിൽ 135 ബില്യൻ ദിർഹം ചേർത്തു-മുൻവർഷത്തെ അപേക്ഷിച്ച് അസാധാരണമായ 42 ശതമാനം വർധനവ്.  2031-നകം വാർഷിക വിദേശ വ്യാപാരത്തിൽ 4 ട്രില്യൻ ദിർഹത്തിലെത്താൻ 2021-ൽ ഞങ്ങൾ ലക്ഷ്യം വച്ചിരുന്നു. 2024 അവസാനത്തോടെ ആ ലക്ഷ്യത്തിൻ്റെ 75 ശതമാനം നേടി. ഈ വേഗത്തിൽത്തന്നെ ഷെഡ്യൂളിന് വർഷങ്ങൾക്ക് മുൻപ് തന്നെ ഞങ്ങൾ അതിൽ എത്തിച്ചേരുമെന്നും ഷെയ്ഖ് മുഹമ്മദ് പറഞ്ഞു.