‘യാത്രക്കാരൻ കാണാത്ത കാര്യങ്ങൾ’; ‘ബിടിഎസ്’ വിഡിയോയിലെ നയലംഘനത്തിൽ ജീവനക്കാരെ പിരിച്ചുവിട്ടിട്ടില്ലെന്ന് എമിറേറ്റ്സ്

ദുബായ് ∙നയലംഘനം നടത്തിയെന്ന് ആരോപിക്കപ്പെടുന്ന ബിഹൈൻഡ് ദ് സീൻ (ബിടിഎസ്) വിഡിയോയിൽ ഉൾപ്പെട്ട ക്രൂ അംഗങ്ങളെ പിരിച്ചുവിട്ടു എന്ന വാർത്ത ദുബായ് ആസ്ഥാനമായി പ്രവർത്തിക്കുന്ന എമിറേറ്റ്സ് എയർലൈൻ നിഷേധിച്ചു. ഇക്കാര്യം നേരത്തെ തന്നെ അന്വേഷിച്ചതാണ്. സംഭവത്തിൽ എന്നാൽ ജീവനക്കാരെ പിരിച്ചുവിട്ടിട്ടില്ലെന്നും എമിറേറ്റ്സ് വക്താവ് അറിയിച്ചു.

സംശയാസ്പദമായ ബിടിഎസ് വിഡിയോ 2024 മേയിൽ ഒരു മുൻ എമിറേറ്റ്സ് ഫ്ലൈറ്റ് അറ്റൻഡന്റ് അപ്‌ലോഡ് ചെയ്‌തതാണ്. 'ഒരു യാത്രക്കാരനെന്ന നിലയിൽ നിങ്ങൾ കാണാത്ത കാര്യങ്ങൾ' എന്ന തലക്കെട്ടിലുള്ള ഷാങ്ഹായിലേക്കുള്ള ഒരു യാത്രയുടെ വിഡിയോ, അനധികൃത ഭക്ഷണം തയ്യാറാക്കൽ, നിയന്ത്രിത മേഖല പ്രവേശനം എന്നിവ ഉൾപ്പെടെ നിരവധി നയ ലംഘനങ്ങൾ പ്രദർശിപ്പിച്ചതായി ആരോപിക്കപ്പെടുന്നു. യൂട്യൂബിൽ ഇപ്പോഴും ലഭ്യമായ വിഡിയോയുടെ പ്രചാരത്തിനെതിരെ എമിറേറ്റ്സ് മറ്റെന്തെങ്കിലും നടപടികൾ സ്വീകരിച്ചിട്ടുണ്ടോ എന്ന്  വ്യക്തമല്ല. വിഡിയോ 13 ലക്ഷത്തിലേറെ പേർ കണ്ടിരുന്നു.