യുഎഇയുടെ വിവിധ ഭാഗങ്ങളിൽ മഴ

ദുബായ് ∙ യുഎഇയുടെ വിവിധ ഭാഗങ്ങളിൽ മഴ പെയ്തു. ഇന്ന് ഉച്ചയോടെയാണ് ദുബായിലെ വിവിധ പ്രദേശങ്ങളിൽ നേരിയ മഴ ലഭിച്ചത്. ഖിസൈസ്, മുഹൈസിന എന്നിവിടങ്ങളിൽ തിങ്കളാഴ്ച രാത്രിയും നേരിയ മഴ പെയ്തിരുന്നു. ഇന്ന് ഉച്ചയോടെ ഖവാനീജ് ഭാഗങ്ങളിലും മഴ പെയ്തു.

ഇന്ന് രാജ്യത്തിന്റെ വിവിധ ഭാഗങ്ങളിൽ മഴയ്ക്ക് സാധ്യതയുണ്ടെന്നും മൂടിക്കെട്ടിയ അന്തരീക്ഷമായിരിക്കുമെന്നും പൊടിക്കാറ്റിനും സാധ്യതയുണ്ടെന്നും നേരത്തെ ദേശീയ കാലാവസ്ഥാ കേന്ദ്രം അറിയിച്ചിരുന്നു.   

നേരിയ തോതിൽ വടക്കുകിഴക്ക് മുതൽ വടക്ക് പടിഞ്ഞാറ് വരെ കാറ്റ് വീശാൻ സാധ്യതയുണ്ട്. കാറ്റിൻ്റെ വേഗം മണിക്കൂറിൽ 10 കി.മീ മുതൽ 25 കി.മീ വരെ ആയിരിക്കും. ചിലപ്പോൾ മണിക്കൂറിൽ 40 കി.മീറ്ററും. അറേബ്യൻ ഗൾഫിൽ കടൽ പ്രക്ഷുബ്ധമായേക്കാം. ഒമാൻ കടലിൽ നേരിയതോ മിതമായതോ ആയിരിക്കും അവസ്ഥ.