സൗദി ഈന്തപ്പഴ ഉൽപാദനം; 2024 ൽ 1.9 ദശലക്ഷം ടൺ കവിഞ്ഞതായി റിപ്പോ‍ർട്ട്

റിയാദ് ∙ സൗദിയിലെ ഈന്തപ്പഴ ഉൽപാദനം 2024ൽ 1.9 ദശലക്ഷം ടൺ കവിഞ്ഞതായി കണക്കുകൾ. പരിസ്ഥിതി, ജലം, കൃഷി മന്ത്രാലയമാണ് സൗദി ഈന്തപ്പഴ ഉൽപാദനത്തിന്റെ കണക്ക് പുറത്തു വിട്ടത്. ഈ ഗണ്യമായ ഉൽപ്പാദനത്തിലൂടെ ആഭ്യന്തര ഡിമാൻഡ് മാത്രമല്ല ലോകമെമ്പാടുമുള്ള നിരവധി രാജ്യങ്ങളിലേക്ക് കയറ്റുമതിയും സൗദി നടത്തുന്നു. 

ഈന്തപ്പഴത്തിന്റെ ലോകത്തിലെ ഏറ്റവും വലിയ ഉത്പാദകരും കയറ്റുമതിക്കാരും എന്ന പദവി ഉറപ്പിച്ചുകൊണ്ട് സൗദി അറേബ്യ ഈന്തപ്പഴ ഉൽപാദനത്തിൽ 119% സ്വയംപര്യാപ്തത കൈവരിച്ചു. കയറ്റുമതിയും പുനർ കയറ്റുമതിയും ഏകദേശം 351,000 ടണ്ണിലെത്തി.  റമസാൻ മാസമായതിനാൽ സൗദി ഈന്തപ്പഴങ്ങൾക്ക് മുൻഗണന നൽകുന്നതിന് മന്ത്രാലയം ഉപഭോക്താക്കളെ പ്രോത്സാഹിപ്പിക്കുന്നുണ്ട്.

പ്രാദേശിക ഉൽപന്നങ്ങൾ തിരഞ്ഞെടുക്കുന്നത് കർഷകരെ പിന്തുണയ്ക്കുകയും ദേശീയ സമ്പദ്‌വ്യവസ്ഥയെ ശക്തിപ്പെടുത്തുകയും സുസ്ഥിരതയ്ക്കുള്ള സൗദി അറേബ്യയുടെ പ്രതിബദ്ധതയുമായി യോജിപ്പിക്കുകയും ചെയ്യുമെന്നും മന്ത്രാലയം എടുത്തുപറഞ്ഞു.