ബഹ്റൈന്റെ ആദ്യ തദ്ദേശീയ സാറ്റലൈറ്റ്; 'അൻ മുൻതർ' വിക്ഷേപണം 12ന്

മനാമ ∙പൂർണമായും തദ്ദേശീയമായി നിർമിച്ച ബഹ്റൈന്റെ  'അൽ മുൻതർ' ഉപഗ്രഹ വിക്ഷേപണം ഈ മാസം 12ന് നടക്കും. ട്രാൻസ്‌പോർട്ടർ-13 മിഷന്റെ ഭാഗമായ ഉപഗ്രഹം ബുധനാഴ്ച രാവിലെ പ്രാദേശിക സമയം 9.39നാണ്  വിക്ഷേപിക്കുന്നതെന്ന് നാസ അറിയിച്ചു. കാലാവസ്ഥ, അന്തരീക്ഷ സാഹചര്യങ്ങൾ, മറ്റ് വിക്ഷേപണങ്ങൾ എന്നിവയുൾപ്പെടെ നിരവധി ഘടകങ്ങളെ അടിസ്ഥാനമാക്കി വിക്ഷേപണ സമയത്തിൽ മാറ്റങ്ങൾ ഉണ്ടായേക്കാം.

ബഹ്‌റൈന്റെ 'അൽ മുൻതർ' ഉൾപ്പെടെ ഏകദേശം 40 പേലോഡുകൾ വഹിക്കുന്ന സ്‌പേസ് എക്‌സ് ഫാൽക്കൺ 9 റോക്കറ്റ് കലിഫോർണിയയിലെ അമേരിക്കൻ വാൻഡൻബർഗ് സ്‌പേസ് ഫോഴ്‌സ് ബേസിൽ നിന്നാണ്  വിക്ഷേപിക്കുക. റോക്കറ്റ് പേലോഡ് റോക്കറ്റിൽ നിന്ന് വേർപെടുത്തുന്നതിന് മുമ്പ് ടേക്ക്-ഓഫിൽ തുടങ്ങി മൂന്ന് ഘട്ടങ്ങളുണ്ടാകും.  ഉപഗ്രഹം സമുദ്രനിരപ്പിൽ നിന്ന് 550 കിലോമീറ്റർ ഉയരമുള്ള  ഭ്രമണപഥത്തിൽ പ്രവേശിക്കുമെന്ന് പ്രതീക്ഷിക്കുന്നതായി അധികൃതർ പറഞ്ഞു. നാനോ സാറ്റലൈറ്റിൽ നാല് സാങ്കേതിക പേലോഡുകളാണ്  ഉണ്ടാവുക .

ചിത്രങ്ങൾ പകർത്താൻ കഴിവുള്ള ഒരു മീഡിയം റെസല്യൂഷൻ സ്‌പേസ് ക്യാമറയുള്ള ഒരു റിമോട്ട് സെൻസറിങ് പേലോഡ് ബഹ്‌റൈന്റെയും അതിന്റെ പ്രാദേശിക ജലാശയങ്ങളുടെയും ബഹിരാകാശത്ത് നിന്ന് ചിത്രങ്ങൾ എടുക്കും. ഈ ചിത്രങ്ങൾ പിന്നീട് പരിസ്ഥിതി, കാർഷിക പഠനങ്ങൾ, കാലാവസ്ഥാ വ്യതിയാന  വിശകലനം, തീരദേശ നിരീക്ഷണം എന്നിവയിലും മറ്റും ഉപയോഗിക്കുന്നതിനായി  കഴിയും, 

ചിത്രങ്ങൾ  വിശകലനം ചെയ്യുന്നതിനും ശാസ്ത്രീയ ഉപയോഗത്തിന്റെ അടിസ്ഥാനത്തിൽ അവയെ തരംതിരിക്കുന്നതിനും നൂതന എ ഐ സംവിധാനം  ഉപയോഗിക്കും. അൽ മുൻതറിന്റെ ദൗത്യത്തിന്റെ ഭാഗമായി ശേഖരിക്കുന്ന ഡാറ്റയെ ഒരു സൈബർ സുരക്ഷാ പേലോഡ് സംരക്ഷിക്കുകയും അത് അനധികൃത ഹാക്കിങ്ങിനോ പരിഷ്കരണത്തിനോ വിധേയമാകുന്നില്ലെന്ന് ഉറപ്പാക്കുകയും ചെയ്യും.

 റേഡിയോ പ്രക്ഷേപണ പേലോഡ് ഉൾപ്പെടുന്ന സാങ്കേതിക വിദ്യ രാജ്യത്തിന്റെ ദേശീയഗാനം ലോകമെമ്പാടും ഹാം റേഡിയോ ഓപ്പറേറ്റർമാർക്കും സാറ്റലൈറ്റ് സ്റ്റേഷനുകൾക്കും പ്രക്ഷേപണം ചെയ്യുവാനും  ബഹ്‌റൈന്റെ നേട്ടങ്ങൾ എടുത്തുകാണിക്കുന്ന ബഹ്‌റൈൻ രാജാവിന്റെ  പ്രസംഗവും പ്രക്ഷേപണത്തിൽ ഉൾപ്പെടുത്തുകയും ചെയ്യുമെന്ന്  പ്രോജക്ട് മാനേജർ ആയിഷ അൽ ഹറാം മാധ്യമങ്ങളോട് പറഞ്ഞു.

നൂതന സാങ്കേതികവിദ്യകൾ ഉൾക്കൊള്ളുന്നതും ബഹ്‌റൈൻ എൻജിനീയർമാരുടെ കാര്യക്ഷമതയും നൂതന ബഹിരാകാശ പദ്ധതികൾ കൈകാര്യം ചെയ്യാനുള്ള അവരുടെ കഴിവും പ്രകടിപ്പിക്കുന്നതുമായ ഒരു ബഹ്‌റൈൻ ഉപഗ്രഹം നിർമ്മിക്കുക എന്ന  ലക്ഷ്യമാണ്  ഇതിലൂടെ നിറവേറ്റുന്നതെന്ന് അൽ മുൻതറിന്റെ പ്രോജക്ട് മാനേജർ ആയിഷ അൽ ഹറാം പറഞ്ഞു .

ടീമിലെ പ്രധാന അംഗങ്ങളിൽ എൻജിനീയറിങ് സ്പെഷ്യലിസ്റ്റ് യാഗൂബ് അൽകാസാബ്, ക്വാളിറ്റി മാനേജ്‌മെന്റ് ഓഫിസർ ആമിന അൽബലൂഷി, സാറ്റലൈറ്റ് സോഫ്റ്റ്‌വെയർ ഡെവലപ്‌മെന്റ് ഓഫിസർ അലി അൽ മഹ്മൂദ്, കമ്മ്യൂണിക്കേഷൻസ് സിസ്റ്റംസ് ഓഫിസർ റീം സേനൻ, പവർ സിസ്റ്റംസ് ഓഫിസർ അലി അൽഖരാൻ, മിഷൻ പ്ലാനിങ് ആൻഡ് ഓർബിറ്റൽ പെർഫോമൻസ് അനാലിസിസ് ഓഫിസർ അഹമ്മദ് ബുഷ്ലൈബി, മെക്കാനിക്കൽ സിസ്റ്റം ഓഫിസർ അഷ്‌റഫ് ഖാത്തർ, സ്‌പേസ് ക്യാമറ പേലോഡ് ഡെവലപ്‌മെന്റ് ഓഫിസർ മുനീറ അൽ മാൽക്കി, ഇന്റഗ്രേഷൻ ആൻഡ് ടെസ്റ്റിങ്ഓഫിസർ യൂസിഫ് അൽ ഖത്തൻ, ഫ്രീക്വൻസി റജിസ്ട്രേഷൻ ഓഫിസറും ഗ്രൗണ്ട് സ്റ്റേഷൻ ടീം അംഗവുമായ മർവാൻ അൽമീർ എന്നിവരും ഉൾപ്പെടുന്നു. എൻ‌എസ്‌എസ്‌എ വെബ്‌സൈറ്റായ nssa.gov.bh-ൽ ലോഞ്ച് തത്സമയം സംപ്രേഷണം ചെയ്യും, കൂടാതെ അപ്‌ഡേറ്റുകൾ ഇൻസ്റ്റഗ്രാമിലെ @nssa_bh-ലും പോസ്റ്റ് ചെയ്യും. 

 "അൽ മുൻതർ" ഉപഗ്രഹം വിക്ഷേപിക്കാൻ തയ്യാറെടുക്കുമ്പോൾ, യുണൈറ്റഡ് അറബ് എമിറേറ്റ്‌സിലെ മുഹമ്മദ് ബിൻ റാഷിദ് സ്‌പേസ് സെന്ററുമായി (എംബിആർഎസ്‌സി) സഹകരിച്ച് നാഷണൽ സ്‌പേസ് സയൻസ് ഏജൻസി (എൻഎസ്‌എസ്‌എ), എമിറാത്തി ബഹിരാകാശയാത്രികരായ മുഹമ്മദ് അൽ മുല്ല, നോറ അൽ മത്രൂഷി എന്നിവരെ ഉൾപ്പെടുത്തി ഒരു വെർച്വൽ സെഷൻ മീറ്റിങ് ഈയിടെ സംഘടിപ്പിച്ചിരുന്നു.

ബഹ്‌റൈനിലുടനീളമുള്ള സർവകലാശാലകൾ, പൊതു, സ്വകാര്യ സ്‌കൂളുകൾ എന്നിവയുൾപ്പെടെ പത്ത് വിദ്യാഭ്യാസ സ്ഥാപനങ്ങളിൽ നിന്നുള്ള 1,000-ത്തിലധികം വിദ്യാർഥികളും  സെഷനിൽ പങ്കെടുത്തു.