യാത്രകളിലും യാത്രക്കാരുടെ എണ്ണത്തിലും വർധന; ആഡംബര വാഹന ഉപയോഗത്തിൽ മുന്നേറ്റവുമായി ദുബായ്

ദുബായ്∙ എമിറേറ്റിലെ ആഡംബര വാഹന ഉപയോഗത്തിൽ  2024-ൽ മികച്ച മുന്നേറ്റം. 2023-ലെ 30,219,821 യാത്രകളെ അപേക്ഷിച്ച്, 2024-ൽ 43,443,678 യാത്രകളായി 44% വളർച്ച രേഖപ്പെടുത്തിയതായി ദു​ബായ് റോ​ഡ്​ ഗ​താ​ഗ​ത അ​തോ​റി​റ്റി(​ആ​ർടിഎ) അ​റിയിച്ചു.

ആഡംബര ഗതാഗത മേഖലയിലും ഇ-ഹെയ്ൽ സേവനങ്ങളിലുമുള്ള  വളർച്ച ദുബായിലെ റോഡ്സ് ആൻഡ് ട്രാൻസ്പോർട്ട് അതോറിറ്റി(ആർടിഎ) ഗതാഗത സംവിധാനം മെച്ചപ്പെടുത്തുന്നതിനും താമസക്കാരുടെയും സന്ദർശകരുടെയും വർധിച്ചുവരുന്ന ആവശ്യങ്ങൾ നിറവേറ്റുന്നതിനുമായി സ്വീകരിച്ച നടപടികളുടെ വിജയമായി കണക്കാക്കുന്നു.

സമീപ വർഷങ്ങളിൽ ഈ സുപ്രധാന മേഖല സുസ്ഥിരമായ വളർച്ച കൈവരിച്ചു. ദുബായിയുടെ ആഡംബര ഗതാഗത സേവനങ്ങളിലെ യാത്രക്കാരുടെ എണ്ണം 2024 ൽ 75,592,000 ആയിരുന്നു. 2023 ൽ 52,582,488 ൽ നിന്ന് സമാനമായ 44 ശതമാനം വളർച്ചാ നിരക്കിനെയാണ് ഇത് പ്രതിഫലിപ്പിക്കുന്നത്. നിക്ഷേപത്തിനും വിനോദസഞ്ചാരത്തിനുമുള്ള ആഗോള ലക്ഷ്യസ്ഥാനമെന്ന നിലയിലേക്ക് ദുബായിയുടെ സ്ഥാനം ഉറപ്പാക്കിയതാണ് കണക്കുകളിൽ പ്രതിഫലിക്കുന്നതെന്ന്  ആർ‌ടി‌എ  പബ്ലിക് ട്രാൻസ്പോർട്ട് ഏജൻസി പ്ലാനിങ് ആൻഡ് ബിസിനസ് ഡെവലപ്‌മെന്റ് ഡയറക്ടർ ആദിൽ ഷക്രി പറഞ്ഞു.

ഇ-ഹെയിൽ സർവീസുകളിലും  32 ശതമാനം വളർച്ചയുണ്ടായി. 2023-ൽ 24,616,527 ആയിരുന്ന യാത്രകൾ 2024-ൽ 32,556,975 ആയി ഉയർന്നു. ഓപ്പറേറ്റിങ് കമ്പനികളുടെ എണ്ണം 2023-ൽ 9-ൽ നിന്ന് 2024-ൽ 13 ആയി വർധിച്ചു. അതേസമയം ഇതേ കാലയളവിൽ ഫ്ലീറ്റ്  12,602-ൽ നിന്ന് 16,396 വാഹനങ്ങളായി വർധിച്ചു.