കുട്ടികൾക്ക് വാരാന്ത്യം അടിപൊളിയാക്കാം, 50 ദിർഹത്തിന് എല്ലാ റൈഡിലും കയറാം; വമ്പൻ ഓഫറുമായി ഗ്ലോബൽ വില്ലേജ്

ദുബായ് ∙ സീസൺ അവസാനിക്കാനിരിക്കെ ഗ്ലോബൽ വില്ലേജിൽ കുട്ടികൾക്ക് സൗജന്യ പ്രവേശനം പ്രഖ്യാപിച്ചതിനു പിന്നാലെ, കാർണിവലിലെ റൈഡുകളിൽ എത്ര തവണയും വേണമെങ്കിലും കയറാമെന്ന ഓഫറുമെത്തി. 50 ദിർഹത്തിന്റെ ടിക്കറ്റിൽ ഏതു പ്രായക്കാർക്കും കാർണിവലിലെ ഏതു റൈഡിലും എത്ര തവണ വേണമെങ്കിലും കയറാം.

ജയന്റ് വീൽ, ഗ്ലോബൽ ബുർജ്, ജമൈക്ക ട്രം, ഹോണോലോ ലൂപ്, ഹോളണ്ട് വിൻഡ് വീൽ സ്വിങ്, സെവൻ സീ പൈറേറ്റ്, സ്പാനിയ ബോട്ട് ഉൾപ്പെടെ ഏതു റൈഡിലും കയറാം. ഏതു പ്രായക്കാർക്കും ആസ്വദിക്കാവുന്ന റൈഡുകളാണിതെല്ലാം. 9 ദിവസം കൂടി മാത്രമാണ് ഗ്ലോബൽ വില്ലേജുള്ളത്. വൈകിട്ട് 4 മുതൽ രാത്രി ഒന്നുവരെയാണ്  പ്രവർത്തന സമയം.