തൊഴിൽ നഷ്ട ഇൻഷുറൻസ്: വിതരണം ചെയ്തത് 18 കോടി ദിർഹം; 17,000 പേർക്ക് ആനുകൂല്യം
Mail This Article
അബുദാബി ∙ യുഎഇയിൽ നിർബന്ധിത തൊഴിൽ നഷ്ട ഇൻഷുറൻസ് പദ്ധതി പ്രകാരം 17,000 പേർക്ക് ആനുകൂല്യം ലഭിച്ചു. മൊത്തം 18 കോടി ദിർഹമാണ് ഈയിനത്തിൽ വിതരണം ചെയ്തത്. 2023 ജനുവരിയിൽ ആരംഭിച്ച പദ്ധതിയിൽ ആദ്യവർഷം തന്നെ 68 ലക്ഷം പേർ ചേർന്നിരുന്നതായി മാനവശേഷി സ്വദേശിവൽക്കരണ മന്ത്രി ഡോ. അബ്ദുൽറഹ്മാൻ അൽഅവാർ പറഞ്ഞു.
യുഎഇയിൽ ജോലി നഷ്ടപ്പെട്ടാൽ 3 മാസം വരെ ഇൻഷുറൻസ് പരിരക്ഷ നൽകുന്നതാണു തൊഴിൽ നഷ്ട ഇൻഷുറൻസ് പദ്ധതി. ജോലി നഷ്ടപ്പെട്ടാൽ അടിസ്ഥാന ശമ്പളത്തിന്റെ 60% തുക നഷ്ടപരിഹാരമായി 3 മാസത്തേക്കു ലഭിക്കും. ആദ്യ പദ്ധതിയിൽ ചേർന്നവർക്കു മാസത്തിൽ 10,000 ദിർഹത്തിൽ കൂടാത്ത തുകയും രണ്ടാമത്തെ വിഭാഗത്തിലുള്ളവർക്ക് 20,000 ദിർഹത്തിൽ കൂടാത്ത തുകയുമാണു ലഭിക്കുക.
ഇൻഷുറൻസ് കമ്പനിയുടെ ഇ–പോർട്ടൽ (www.iloe.ae) വഴിയോ സ്മാർട്ട് ആപ്ലിക്കേഷൻ (ILOE) വഴിയോ അപേക്ഷിക്കാനും പുതുക്കാനും സാധിക്കും. തുടർച്ചയായി 12 മാസമെങ്കിലും ഒരു സ്ഥാപനത്തിൽ ജോലി ചെയ്തവരും സ്വന്തം കാരണത്താലല്ലാതെ പിരിച്ചുവിടപ്പെട്ടവർക്കുമാണ് ആനുകൂല്യം ലഭിക്കുക.
നിക്ഷേപകർ, വീട്ടുജോലിക്കാർ, താൽക്കാലിക തൊഴിൽ കരാറുള്ള ജീവനക്കാർ, 18 വയസ്സിന് താഴെയുള്ളവർ, വിരമിച്ച ശേഷം പുതിയ ജോലിയിൽ പ്രവേശിച്ചവർ എന്നിവർക്ക് ഇളവുണ്ട്. പദ്ധതിയിൽ ചേരാത്തവർക്കും യഥാസമയം പുതുക്കാത്തവർക്കും 400 ദിർഹമാണ് പിഴ. കൂടുതൽ വിവരങ്ങൾക്ക്: 600 599555.
17,000 people have benefited from the UAE unemployment insurance scheme
