'മെയ്ക്ക് ഇറ്റ് ഇൻ എമിറേറ്റ്‌സ് ': 2000 അവശ്യ ഉൽപന്നങ്ങൾ തദ്ദേശീയമായി നിർമിക്കുമെന്ന് വ്യവസായ-ഉന്നത സാങ്കേതിക മന്ത്രി

അബുദാബി ∙ നിലവിൽ ഇറക്കുമതി ചെയ്യുന്ന 2000 അവശ്യ ഉൽപന്നങ്ങളെ യുഎഇ തദ്ദേശീയമായി നിർമിക്കാൻ ഒരുങ്ങുന്നു. വ്യവസായ-ഉന്നത സാങ്കേതിക മന്ത്രി ഡോ. സുൽത്താൻ അൽ ജാബർ അബുദാബിയിൽ നടത്തിയ 'മെയ്ക്ക് ഇറ്റ് ഇൻ എമിറേറ്റ്‌സ് ഫോറത്തിലാണ് ഈ പദ്ധതി പ്രഖ്യാപിച്ചത്.

ഇതു പ്രകാരം പുതിയ സംരംഭങ്ങൾക്കും നിക്ഷേപങ്ങൾക്കും വാതിലൊരുക്കും. പ്ലാറ്റ്‌ഫോം വഴി 5,000-ലധികം തദ്ദേശീയ ഉൽപന്നങ്ങൾ പ്രദർശിപ്പിക്കുകയും വിവിധ മേഖലകളിലേക്കുള്ള വ്യാപനത്തിന് വഴിയൊരുക്കുകയും ചെയ്യും. ഈ മാസം 19 മുതൽ 22 വരെ അബുദാബി നാഷനൽ എക്‌സിബിഷൻ സെന്ററി(അഡ്നെക്)ൽ നടക്കുന്ന ഫോറം 12 പ്രധാന വ്യവസായമേഖലകളെ കേന്ദ്രീകരിച്ചായിരിക്കുമെന്നും അറിയിച്ചു.

2024-ലെ വിദേശവ്യാപാരത്തിൽ 5 ട്രില്യൻ ദിർഹം തികയുകയും വ്യാപാരമിച്ചം 490 ബില്ല്യൻ ദിർഹമാകുകയും ചെയ്തു. ഇതൊരു വെളിപ്പെടുത്തൽ മാത്രമല്ല, സമഗ്രമായ സാമ്പത്തിക ദിശാസൂചികയാണെന്നും മന്ത്രി വ്യക്തമാക്കി. ഭൗമസ്ഥാനം, ആധുനിക ലോജിസ്റ്റിക്സ്, ഓപൺ മാർക്കറ്റ്, നിക്ഷേപ സൗഹൃദ വ്യവസ്ഥകൾ  എന്നീ ഗുണങ്ങളാണ് യുഎഇക്ക് തുണയാകുന്നത്.