കിടപ്പുമുറിയിൽ മരിച്ച നിലയിൽ കണ്ടെത്തിയ മലയാളി ഇസ്രയേലിലേക്ക് പോയത് ഒന്നര മാസം മുൻപ്; വയോധികയുടെ മരണത്തിലും ദുരൂഹത

ബത്തേരി (വയനാട്) ∙ ഇസ്രയേലിൽ കെയർ ഗിവർ (പ്രായമായവരെ പരിചരിക്കൽ) ജോലി ചെയ്യുന്ന വയനാട് ബത്തേരി സ്വദേശിയായ യുവാവും വീട്ടുടമസ്ഥയായ വയോധികയും മരിച്ച നിലയിൽ. ജറുസലേമിനു സമീപം മേവസേരേട്ട് സിയോനിലാണ് സംഭവം. ബത്തേരി കോളിയാടി പെലക്കുത്ത് ജിനേഷ് പി.സുകുമാരനും (38) അദ്ദേഹം ജോലി ചെയ്തിരുന്ന വീട്ടിലെ വയോധികയുമാണ് മരിച്ചത്.

വയോധികയുടെ ഭർത്താവിനെ പരിചരിക്കുന്ന ജോലിയായിരുന്നു ജിനേഷിന്. അവരുടെ ബന്ധുക്കൾ വെള്ളിയാഴ്ച ഉച്ചയോടെ വീട്ടിൽ എത്തിയപ്പോഴാണ് സ്ത്രീയെ കുത്തേറ്റു മരിച്ച നിലയിലും ജിനേഷിനെ കിടപ്പുമുറിയിൽ തൂങ്ങി മരിച്ച നിലയിലും കണ്ടെത്തിയത്. ബത്തേരി കൈവട്ടമൂല പെലക്കുത്ത് വീട്ടിൽ രാധയുടെയും പരേതനായ സുകുമാരന്റെയും മകനാണ് ജിനേഷ്. ഒന്നര മാസം മുൻപാണ് ഇസ്രയേലിലേക്ക് പോയത്. ഭാര്യ: രേഷ്മ, മകൾ: ആരാധ്യ.