അവളുടെ വെളിപാട്: അവലോകനം

എന്റെ പ്രിയ സുഹൃത്തും അറിയപ്പെടുന്ന എഴുത്തുകാരിയുമായ ത്രേസ്യാമ്മ തോമസ് നാടാവള്ളിൽ , തന്റെ പുസ്തകത്തിന്  " അവളുടെ വെളിപാടുകൾ " മനോരമക്കു വേണ്ടി ഒരു അവലോകനം എഴുതുവാൻ ആവശ്യപ്പെട്ടപ്പോൾ അത് ഒരു വലിയ അംഗീകാരമായിത്തന്നെ എനിക്ക് തോന്നുന്നു . ചില ക്രിസ്ത്യൻ പുസ്തകങ്ങൾക്ക് അവലോകനം എഴുതിയിട്ടുണ്ടെങ്കിലും ഒരു സമകാലിക പുസ്തകത്തിന് വേണ്ടി ഇതാദ്യമായാണ് എഴുതുന്നത് . പത്തനംതിട്ട ജില്ലയിലെ മൈലപ്രയിൽ , സി.എം.പാപ്പി , ഏലിയാമ്മ ദമ്പതികളുടെ മകളായ ത്രേസ്യാമ്മ തോമസ് , മലയാള സാഹിത്യത്തിൽ ബിരുദാനന്തര ബിരുദവും ബിഎഡും കരസ്ഥമാക്കിയിട്ടുണ്ട്. പല വിദേശ രാജ്യങ്ങളിലും നൈജീരിയ,  കാനഡ , ഓസ്‌ട്രേലിയ ജോലി ചെയ്തിട്ടുള്ള ലേഖിക ഇപ്പോൾ അമേരിക്കയിൽ കുടുംബ സമേതം സ്ഥിര താമസമാക്കിയിരിക്കുന്നു . 

അധ്യാപികയായി സേവനം അനുഷ്ഠിക്കുന്ന കാലത്തു കൗമാര കാരുടെ സംശയങ്ങൾക്ക് മറുപടി നൽകാനായി ഒരു മാഗസിനിൽ കൊച്ചേച്ചി എന്ന അപരനാമത്തിൽ എഴുതിയാണ് എഴുത്തു രംഗത്തേക്ക് കടന്നു വരുന്നത് . ചില പ്രസിദ്ധ ന്യൂസ് പേപ്പറുകളിൽ ( മാതൃഭൂമി , കലാകൗമുദി) തന്റെ കവിതകളും പ്രസിദ്ധീകരിച്ചിട്ടുണ്ട് ... ആഴ്ചവട്ടം എന്നൊരു പത്രത്തിൽ  ലേഖിക്കക്കു വേണ്ടി മാത്രമായി ഒരു കോളം  ഉണ്ടായിരുന്നു . ദേശത്തും വിദേശത്തും താമസിച്ചിട്ടുള്ള ഈ എഴുത്തുകാരിയുടെ പുസ്തകങ്ങൾ രണ്ടു കൾച്ചറുകളും പ്രതിഫലിപ്പിക്കുന്നു എന്നത് ശ്രദ്ധേയമാണ്.

" അവളുടെ വെളിപാടുകൾ " എന്ന ഈ പുസ്തകം ഓരോ വ്യക്തികളും വായിച്ചിരിക്കേണ്ട ഒരു സമാഹാരം തന്നെ എന്നതിന് യാതൊരു സംശയവും ഇല്ല . ഒറ്റ ഇരുപ്പിൽ വായിച്ചു തീർക്കാൻ  സാധിക്കുന്ന ഒരു പുസ്തക  സമാഹാരം ...ഇന്ന് കേരളത്തിൽ സംഭവിച്ചുകൊണ്ടിരിക്കുന്ന പല സമകാലിക പ്രശ്നങ്ങളും ലേഖിക ഈ പുസ്തകത്തിലൂടെ തുറന്നു കാട്ടുന്നു ..ഒരു കാലത്തുണ്ടായിരുന്ന കൂട്ട് കുടുംബങ്ങൾ ഇന്ന്  അണു  കുടുംബമായി മാറിയതിന്റെ അനന്തരഫലവും , പുതുതലമുറക്ക്  നഷ്ട്ടപ്പെട്ട സൗഭ്യാഗ്യങ്ങളും ഈ പുസ്തകത്തിലൂടെ ലേഖിക വിവരിക്കുന്നു . 

പ്രത്യകിച്ചും എല്ലാ സ്ത്രീകളും ഇന്നത്തെ കാലഘട്ടത്തിൽ  വായിച്ചിരിക്കേണ്ട ഒരു പുസ്തകമായി ഇതിനെ ഞാൻ വിശേഷിപ്പിക്കുന്നു .  പണ്ടത്തേയും ഇന്നത്തെയും സ്ത്രീകൾ കടന്നുപോയ്കൊണ്ടിരിക്കുന്ന അവസ്ഥാന്തരത്തെ ഇത്ര സുന്ദരമായി വിവരിക്കുന്ന മറ്റൊരു പുസ്തകം ഞാൻ വായിച്ചിട്ടില്ല എന്ന് തന്നെ പറയാം . എങ്ങും ഒറ്റപ്പെടുത്തലുകൾ , പുരുഷ മേധാവിത്വത്തിൽ  ഞെരിഞ്ഞമർന്നവൾ , തന്റെ കഴിവുകളെ മറ്റുള്ളവർക്കുവേണ്ടി  സ്വയം ത്യാഗം ചെയ്തവൾ , എന്നിങ്ങനെ സ്ത്രീകളുടെ നിസ്സഹായാവസ്ഥ വെളിപ്പെടുത്തുന്ന ഈ പുസ്തകം വിരസത ഇല്ലാതെ വായിക്കാം എന്നതും എടുത്തു പറയേണ്ടതാണ് ... എന്നിരുന്നാലും എഴുത്തിൽ എവിടെയോ ഒരു പുരുഷ വിദ്വേഷം ഒളിഞ്ഞിരിക്കുന്നു എന്നെനിക്കു തോന്നാതിരുന്നില്ല ...ഇതെന്റെ വ്യക്തിപരമായ അഭിപ്രായം ...

മറ്റൊരു വിഷയം ,  ഈ പുസ്തകം പുതിയ തലമുറക്കുള്ള ഒരു പ്രചോദനം കൂടി ആണ് . ഫെമിനിസം , സ്ത്രീയുടെ കടമ , ദേശത്തിന്റെയും വിദേശത്തിന്റെയും കൾച്ചറുകൾ , എന്നിവയും ഈ പുസ്തകത്തിൽ പ്രമേയമാക്കിയിട്ടുണ്ട് ..പ്രതിസന്ധികളിൽ എങ്ങനെ കരുത്തേകണം , മനുഷ്യൻ എത്ര വലിയ ഒരു സൃഷ്ടി ആണെന്നും ജീവിതം വളരെ വിലല്ലെടേതാണെന്നും ഈ പുസ്തകം നമുക്ക് പറഞ്ഞു തരും . പ്രണയം അതിന്റെ വിശുദ്ധത  , കാമം മാത്രമല്ല ഒരു സ്ത്രീയിലൂടെ പുരുഷൻ കാണേണ്ടത് ,ചിരിക്കാൻ മറന്നു പോയ സ്ത്രീകൾ , വീട് എന്ന സ്വർഗം , മാതൃഭാഷ മറക്കുന്ന നമ്മുടെ ന്യൂ ജിൻേറഷൻ  കുഞ്ഞുങ്ങൾ അങ്ങനെ പല സമകാലിക വിഷയങ്ങളും ഈ പുസ്തകത്തിലൂടെ ലേഖിക വായനക്കാരുടെ മനസ്സിലെത്തിക്കുന്നു .  മറ്റൊരു പ്രശസ്ത ലേഖികയായ ശ്രീജയുടെ വരികൾ കടമെടുത്താൽ ... അവളുടെ വെളിപാടുകൾ എന്ന ഈ പുസ്തക സമാഹാരം വായിച്ചാൽ , നമുക്ക് " സുനിത കൃഷ്ണനെ " ഒന്ന് നേരിൽ കാണണം എന്ന് തോന്നും ... സിസ്റ്റർ ജെസ്മിയുടെ ആത്മകഥ ഒന്ന് വായിക്കാൻ തോന്നും ... നമ്മുടെ അരികിൽ ഇല്ലാത്ത അമ്മയുടെ മടിത്തട്ടിൽ ഒന്ന് ചാഞ്ഞിരുന്നു കരയാൻ തോന്നും ....

അവളുടെ വെളിപാടുകൾ എന്ന ഈ പുസ്തക സമാഹാരത്തിലൂടെ നാം കാണുന്നത് " ത്രേസ്യാമ്മ തോമസ് " എന്ന കഴിവുറ്റ എഴുത്തുകാരിയെ ആണ് . ഇത്ര വൈഭവം നിറഞ്ഞ ഒരു കലാകാരി ഒരു മലയാള എഴുത്തുകാരി അമേരിക്കൻ മലയാളികളുടെ അഭിമാനം തന്നെ ആണ് .. 

" ഇവിടെ ഈ തുരുത്തിൽ , നിലവിൽ ഇത്തിരി നേരം , സ്നേഹപൂർവ്വം കൊച്ചേച്ചി , എന്നിവ ഈ ലേഖികയുടെ മറ്റു കൃതികൾ ...

ഫോമാ അവാർഡ്  , ഇന്ത്യ  കത്തോലിക്ക അസോസിയേഷൻ അവാർഡ് , വേൾഡ് മലയാളി കൌൺസിൽ അവാർഡ് , എന്നിവയും ഈ പ്രിയ എഴുത്തുകാരിയെ തേടി എത്തിയിട്ടുണ്ട് ...

ഭർത്താവ് തോമസ് മാത്യു , നാടാവള്ളിൽ . മക്കൾ , ഡോക്ടർ ടിറ്റോ തോമസ് ( ഓസ്‌ട്രേലിയ ) , ടീന തോമസ് ( ന്യൂയോർക്ക് ) .