അമ്മ മരിച്ച വീട്
Mail This Article
അവൾ
മരിച്ച വീട്ടിൽ
മുലപ്പാലിന്റെ മണമാണ്
മരണത്തെ
തൊട്ട നിമിഷം വരെയവൾ
അവസാനത്തെ കൊച്ചിനെ
മാറോട് ചേർത്ത്
പിടിച്ചിട്ടുണ്ടായിരുന്നു
എന്ന്
മരണമുറപ്പിച്ചയാൾ
സാക്ഷി പറയുന്നു
കുളിപ്പിക്കുമ്പോഴും
മാറിൽ പറ്റിയ
മുലപ്പാൽക്കറ
കഴുകിക്കളയാൻ
നന്നേ സങ്കടപ്പെട്ടെന്ന്
പറഞ്ഞ്
ആ സ്ത്രീ കരയുന്നുണ്ടായിരുന്നു
അവൾ മരിച്ച വീട്ടിൽ
നിറയെ
മുലപ്പാലിന്റെ മണമായിരുന്നു
ഇഴഞ്ഞിഴഞ്ഞ്
മുറിയിലാകെ
അമ്മയെത്തിരയുന്ന കുഞ്ഞ്
ആ മണം പിടിച്ച്
ചുണ്ടു നുണയുന്നുണ്ടായിരുന്നു
അവൾ മരിച്ച വീട്ടിൽ
നിറയെ
മുലപ്പാലിന്റെ മണമായിരുന്നു
വീടു നിറയെ താരാട്ട്
പാട്ടിന്റെ ഈണമായിരുന്നു
മരിച്ചിട്ടും
മച്ചിൽ തുക്കിയിട്ട
തൊട്ടിലാടുന്നുണ്ടായിരുന്നു
അവൾ മരിച്ച വീട്ടിൽ
നിറയെ
മുലപ്പാലിന്റെ
മണമായിരുന്നു.
അമ്മയായ കാലം മുതൽ
വീടുവിട്ട് പോയിട്ടില്ലെന്ന്
സെറലാക്ക് കലക്കിയ
പാത്രം സദാ കൈയ്യിൽ
കാണുമെന്ന്
അയൽക്കാരി
ആണയിടുന്നു
അവൾ മരിച്ചു
അനാഥരാക്കപ്പെട്ട
കുഞ്ഞുവായകൾ
തൊണ്ട കീറിക്കരയുന്നുണ്ടായിരുന്നു
വീട്ടു വരാന്തയിലെ
ഇരിപ്പിടത്തിനരികിലെ മതിലിൽ
മടിയിൽ മക്കളെ
മാറി മാറി വെച്ചുറക്കിയവളുടെ
തലപ്പാടുണ്ടായിരുന്നു
അവൾ മരിച്ച വീട്ടിൽ
നിറയെ
മുലപ്പാലിന്റെ മണമായിരുന്നു !!