കോവിഡ് ആഞ്ഞടിക്കുന്ന അരിസോണ

ഫീനിക്സ്/അരിസോണ∙ അരിസോണയിൽ കൊറോണ കേസുകളിൽ വൻ വർധന. ഡിസംബർ പതിനാലു വരെയുള്ള കണക്കു പ്രകാരം 7772 കേസുകൾ റിപ്പോർട്ട് ചെയ്തു. അരിസോണയുടെ ചരിത്രത്തിൽ തന്നെ ഇതാദ്യമായി ഐസിയു കോവിഡ്  രോഗികളുടെ എണ്ണം 45 % വർധിച്ചു . 20 % വെന്റിലേറ്റർ ഉപയോഗം കൂടി ( കടപ്പാട് 12 ന്യൂസ് ) . പല ഹോസ്പിറ്റലുകളിലും നഴ്സുമാർ ഉൾപ്പടെ ഉള്ള ഹെൽത്ത് കെയർ വർക്കേഴ്സിന്റെ  അഭാവം മൂലം ആശുപത്രി അധികൃതർ ബുദ്ധി മുട്ടുന്നു . ബാനർ ഹെൽത്ത് ഹോസ്പിറ്റൽ കഴിഞ്ഞ ഒരുമാസം 1000 നഴ്സുമാരെ ആണ് റിക്രൂട്ട ചെയ്‍തത് എന്നു പറയുമ്പോൾ , കൊറോണ രോഗികളുടെ എണ്ണം അരിസോണയിൽ മാത്രം എത്ര ഉണ്ടെന്നു മനസിലാകുമല്ലോ?

തിരഞ്ഞെടുപ്പ് റാലികൾ, മാസ്ക് ധരിക്കാൻ കൂട്ടാക്കാത്ത ഒരു കൂട്ടം ജനത , സ്കൂളുകൾ, കോളജുകൾ , ബാറുകൾ ഒക്കെ തുറന്നു പ്രവർത്തിക്കുന്നതു രോഗം കൂടുതൽ ആളുകളിലേക്ക്‌ പകരാൻ  ഇടയാക്കി . കൊറോണ എന്ന ഈ ഒരു ചെറിയ വൈറസ് ലോകത്തെ തന്നെ നിശബ്ദം ആക്കി എന്ന് പ്രത്യേകം പറയേണ്ടതില്ലല്ലോ .പണ്ട് ഏതോ ഒരു മഹാൻ പറഞ്ഞതുപോലെ , "ദൈവമേ നീ മനുഷ്യനെ സൃഷ്ടിച്ചു എല്ലാത്തിനും അധിപനാക്കി തീർത്തു , പക്ഷെ മനുഷ്യൻ ഓരോ നിമിഷവും കണ്ണിൽ കാണാൻ പോലും കഴിയാത്ത ചെറിയ ജീവികളെ പോലും ഭയന്ന് കഴിയുന്നു " .

എന്റെ കമ്മ്യൂണിറ്റിക്കടുത്തായി ഉള്ള ഒരു കാഴ്ച തന്നെ അതിനു ഒരുദാഹരണം . കൊറോണ വളരെ ശക്തമായി ബാധിച്ച ഒരു ഒരു ബിസിനസ് കൺസ്ട്രക്ഷൻ ആണ് . നൂറു കണക്കിന് വീടുകൾ പകുതിവച്ചു പണി നിർത്തിയ കാഴ്ച ആരെയും വേദനിപ്പിക്കുന്നു . ആരുടെയെല്ലാം സ്വപ്നമാണ് തകർന്നു വീണത് ഈ ഓരോ വീടുകളിലും . ഒരു വീട് നമ്മുടെ എല്ലാം സ്വപ്നം ആണ് , പക്ഷെ ആ സ്വപ്നം തകർന്നു തരിപ്പണമായ ആ കാഴ്ച ഈ വിഡിയോയിൽ കാണാം . എത്ര ആഗ്രഹിച്ചാവും അവർ ഈ വീട് പണി തുടങ്ങിയത്.പെട്ടെന്നാണ് ജോലി നഷ്ടമായതു. അതോടെ ബാങ്കുകൾ വാഗ്ദാനം ചെയ്ത ലോൺ കിട്ടിക്കാണില്ല. അല്ലെങ്കിൽ ഹൗസിങ് കമ്പനികൾ അപ്പ്രൂവ് ചെയ്തു കാണില്ല . ജോലിക്കു വരുന്നവർക്ക് പേ ചെയ്യാൻ മാർഗമില്ല. ചില വീടുകൾ തുടങ്ങിയതേ ഉള്ളു. ചിലതു പകുതി പണി പൂർത്തിയായി , ചിലതു ഓട് മാത്രം ബാക്കി ആയി നിൽക്കുന്നു , ചില വീടുകൾക്ക് മുൻപിൽ സാധനങ്ങൾ ഇറക്കിയിട്ടുണ്ട് , ചിലതു തറ കെട്ടി നിർത്തിയിരിക്കുന്നു , ശരിക്കും ദയനീയമായ കാഴ്ച , എത്ര പേരുടെ തൊഴിൽ നഷ്ടപ്പെട്ടു.

കൊറോണ എന്ന രാക്ഷസന്റെ കിരാത വിളയാട്ടത്തിൽ അനേകം റസ്റ്ററന്റ്, ഇന്ത്യൻ റസ്റ്ററന്റുകൾ അടക്കം അടച്ചു പൂട്ടി .അനേക ജീവിതങ്ങൾ , ഇന്നലെ കണ്ടവരെ ഒരിക്കലും ഇനി കാണാൻ വയ്യാത്ത രീതിയിൽ ഭൂമിയിൽ നിന്നും തുടച്ചു മാറ്റി .( ഞാൻ ഇതെഴുതുമ്പോൾ മായോ ഹോസ്പിറ്റൽ പോളിസിയിൽ മാറ്റം വരുത്തിയിട്ടുണ്ട് , കൊറോണ രോഗി മരിക്കും എന്നുറപ്പായാൽ ഏറ്റവും അടുത്ത നാലു ബന്ധുക്കൾക്ക് രോഗിയെ നേരിൽ കാണാം ) അല്ലെങ്കിൽ  വീഡിയോ വഴി മാത്രമേ കാണാൻ പറ്റു  . അധികം ബാധിക്കാത്ത ബിസിനസ് , ലിക്യുർ ( ബാർ ) ഷോപ്പുകൾ ആണ് . വളരെ തിരക്കായി തന്നെ മാസ്ക് പോലും ധരിക്കാത്ത ആൾക്കാരെ ബാറുകളിൽ കാണാം . 

പണം ഉള്ളവന് ഇതൊന്നും ബാധകം അല്ല . ഈ മാരക വ്യാധിക്കിടയിലും അവർ ബിസിനസ് നടത്തുന്നു . അതിനു ഉത്തമ ഉദാഹരണമാണ് അരിസോണയിലെ സ്കോട്ട്ലയിൽ ( Scotttsdale )ഉള്ള ഗ്രേറ്റ് വോൾഫ് ലോഡ്ജ് എന്ന ഇന്റേണൽ തീം പാർക്ക് . ഈ കഴിഞ്ഞ നവംബറിൽ ആണ് ഇതു പ്രവർത്തനം ആരംഭിച്ചത് .. അതായതു കൊറോണ അതിന്റെ ഉച്ചസ്ഥായിയിൽ എത്തി നിൽക്കുന്ന സമയം . സാധാരണ തീം പാർക്കുകൾ  ഔട്ട് സൈഡ് ആണ് , ഇത് ഇന്റേണൽ ആണ് എന്നതാണ് അതിന്റെ പ്രത്യേകത . വളരെ ചെലവ് കൂടിയ ഈ പാർക്കിൽ രണ്ടുദിവസത്തേക്കു മുറി ഉൾപ്പടെ , (ഭക്ഷണം ഇല്ല , ) പാർക്കിലെ റൈഡ്സിനു 900 ഡോളർ എന്ന് പറയുമ്പോൾ ഞെട്ടണ്ട. മുറികൾ എല്ലാം ഫുൾ ആണ് . മാസങ്ങൾക്കു മുൻപേ ബുക്ക് ചെയ്തെങ്കിലേ റൂം കിട്ടു . എല്ലാവർഷവും പിള്ളേരെ ഒരു വെക്കേഷന് കൊണ്ടുപോകാറുണ്ട് , ഈ വർഷം യാത്രകൾക്ക് നിയന്ത്രണം ഉള്ളതിനാൽ , ഗ്രേറ്റ് വോൾഫ് പാർക്കിൽ പോയി അൽപ സമയം ചിലവഴിക്കാൻ തീരുമാനിച്ചു . ഞങ്ങൾ രണ്ടുപേരും ഹെൽത്ത് കെയർ ജോലിക്കാരായതിനാൽ , ഒരൽപം സമയം തനിയെ വേണം എന്ന് എനിക്കും തോന്നി .

ഏക്കർ കണക്കിന് വ്യാപിച്ചു കിടക്കുന്ന ഒരു ഇന്റേണൽ തീം പാർക്ക് ആണ് ഇത് . മനോഹരമായ ലോബ്ബിയിൽ ചെന്നപ്പോൾ കയ്യിൽ കെട്ടാൻ ഒരു ചെറിയ പ്ലാസ്റ്റിക് റോൾ തന്നു , ഏതാണ്ട് നമ്മുടെ ഹോസ്പിറ്റലിൽ ഒക്കെ കയ്യിൽ കെട്ടുന്ന മാതിരി ഒരു സാധനം . അതിനുള്ളിൽ എല്ലാം ചെറിയ ഒരു ഇലക്ട്രിക്ക് ചിപ്പുകൾ , സർക്യൂട്ട് ഒക്കെ . പിന്നീടാണ് അത് റൂം ഡോർ കീ ആണെന്നു മനസിലായത് . ഡോറിന്റെ മുന്നിൽ കയ്യിൽ കെട്ടിയിരിക്കുന്ന ഈ പ്ലാസ്റ്റിക് വള കാണിച്ചാൽ മാത്രമേ റൂം തുറക്കുകയുള്ളു . ടെക്നോളജി എത്ര വികസിച്ചു എന്നതിന്റെ ഒരു ഉദാഹരണം കൂടി ആണ് ഈ പാർക്ക് . കൊച്ചുകുട്ടികളെയും കൗമാരക്കാരെയും ഉദ്ദേശിച്ചാണ് ഈ പാർക്ക് പ്രവർത്തിക്കുന്നത് . വലിയ തടികഷ്ണങ്ങളാൽ ഉയരത്തിൽ തൂകി ഇട്ടിരിക്കുന്ന സാഹസികമായ ചില റൈഡ്സ്, അമേരിക്കയിലെ നിഞ്ച വാരിയർ എന്ന ഒരു ഗേമിനെ ഓർമിപ്പിക്കുന്ന തരത്തിലുള്ളതായിരുന്നു , ചെറിയ കുട്ടികൾ ഉൾപ്പടെ അതിൽ കൂടി നടക്കുന്നതും , ചില ചെറിയ കുട്ടികൾ അടുത്ത ചുവടു വയ്ക്കാൻ ഭയന്ന് നിൽക്കുന്നതും പതിവ് കാഴ്ചകളിൽ ഒന്ന് .പിന്നൊരാകർഷം മാജി ക്വസ്റ്റ് എന്ന ചെറിയ കോട്ട , കൊച്ചുകുട്ടികൾ എല്ലാം ഒരു ചെറിയ മാജിക് വടി  വാങ്ങണം , അതിനു ഏതാണ്ട് 30 ഡോളർ , എല്ലാം ബിസിനസ് തന്ത്രം , ഒരു ദിവസം എത്ര കുട്ടികൾ കടന്നു വരുന്ന സ്ഥലമാണ് , എത്ര ഡോളർ ആ ഇനത്തിൽ ... പാർക്കിന്റെ പല മൂലകളിലും ഒരു വലിയ വീഡിയോ സ്ക്രീൻ ഉണ്ട് , ഈ വടി ആ ടീവി സ്ക്രീനിലേക്ക് വീശിയാൽ ഡ്രാഗൺ തല കുലുക്കും , മറ്റൊരു ടി വി യിൽ ,  വടിയിൽ നിന്നും ഏതോ ഒരു മാജിക് പവർ പുറപ്പെട്ടു ടി വി സ്‌ക്രീനിലുള്ള ഡ്രാഗൺണ് കത്തി ചാമ്പലാക്കും പോലും.പിള്ളേർ ഒക്കെ കിണഞ്ഞു പരിശ്രമിക്കുന്നു .... ( വടിയിൽ ഉള്ളത് റേഡിയോ ഫ്രീക്വൻസി ) , 30 ഡോളർ എന്റെ കീശയിൽ നിന്നും പോയത് മിച്ചം . റൂമുകളും പ്രത്യേക തീമുകളിൽ ക്യാബിനുകൾ ആയി ഉണ്ടാക്കിയിരിക്കുന്നു. 

പിന്നീടുള്ള മറ്റൊരു ആകർഷണം വാട്ടർ പാർക്ക് ആണ് , അത് മറ്റുള്ള വാട്ടർ പാർക്ക് പോലെ തന്നെ , ഒരു ചെറിയ കൂടാരത്തിനുള്ളിൽ ആണ് എന്ന് മാത്രം . മറ്റു ചില ഗെയിംസുകളും ഉൾപ്പെടുത്തിയിട്ടുണ്ട് . എല്ലാം കഴിയുമ്പോൾ മാജിക് വടി  വാങ്ങിയ പിള്ളാർക്ക് ഒരു സർട്ടിഫിക്കറ്റ് കൊടുക്കും ( മാസ്റ്റർ മാഗി )(Master magi ) പിള്ളാർക്കെതോ ഡോക്ടറേറ്റ് കിട്ടിയ സന്തോഷം ... തൊട്ടടുത്തായി ഒരു ബസ് കിടപ്പുണ്ട് , അടുത്ത് ചെന്ന് നോക്കിയപ്പോ അതൊരു ചെറിയ ഭക്ഷണ ശാല , അവിടെ നിന്നും ഒരു സമൂസയും വാങ്ങി കഴിച്ചു , എന്ന് പറയാൻ അവിടെ സമൂസ ഇല്ല , ചില ബർഗേർസ് , നൂഡിൽസ് ഒക്കെ മാത്രം , തീ വിലയും , എന്തായാലും പിള്ളാർക്ക് സന്തോഷം . വീട്ടിലിരുന്നു ഓൺലൈൻ സ്കൂൾ ചെയ്തതിന്റെ ബോറടി മാറിയ സന്തോഷം ..എനിക്കും ഭാര്യക്കും ജീവിത തിരക്കിൽ നിന്നും രണ്ടു ദിവസം ഒരിത്തിരി വിശ്രമം . എന്തായാലും പൈസ അൽപം പൊടിച്ചു ...അല്ലേലും ഇതൊക്കെ നമ്മുടെ കുടുംബത്തിനു വേണ്ടി അല്ലേ സമ്പാദിക്കുന്നത്.

കൊറോണ അതിന്റെ സംഹാരം ഇപ്പോഴും തുടരുകയാണ്. 2020 അവസാനിക്കാറായല്ലോ ... ഈ മഹാമാരി ഈ വർഷത്തോടെ അവസാനിക്കണമേ എന്ന് നമുക്ക് സർവശക്തനായ ദൈവത്തോട് അപേക്ഷിക്കാം ...പുതിയ വർഷം പുതിയ പ്രതീക്ഷകൾ ഉയരട്ടെ ...വീടുകൾ പണി തീരട്ടെ ..ബിസിനെസ്സുകൾ വളരട്ടെ , പഴയതിനേക്കാൾ ശക്തിയായി മനുഷ്യ രാശി തിരിച്ചു വരട്ടെ ..പുതിയ വർഷത്തിൽ എല്ലാ നന്മകളും ദൈവം തരട്ടെ , പ്രിയ മനോരമ വായനക്കാർക്ക് ,  ഒരു നല്ല പ്രത്യാശയുടെ  ക്രിസ്മസ് പുതുവത്സരംശാസകൾ