അച്ഛനെ തേടുമ്പോൾ
Mail This Article
പൊട്ടിച്ചിരിച്ചും വാരിപ്പുണർന്നും
തെരുതെരെ കവിളിൽ മുത്തമിട്ടും
കൊഞ്ചിച്ചു കൊണ്ടമ്മയെന്നോടു ചൊല്ലി
ഓമലേ വരുന്നുണ്ട് നിന്റെയച്ഛൻ
നാളേറെയായി കൊതിക്കുന്നുണ്ടച്ഛനെ
നേരിലായ് കണ്ടു കഥ പറയാൻ
അച്ഛൻ വരുന്നേരം കൈ പിടിച്ചാ വഴി
നീളെ നടന്നു മൊഴിഞ്ഞിടേണം
കാവിലും പാടത്തും കളിപ്പാട്ടക്കടയിലും
അച്ഛനോടൊപ്പം പോയിടേണം
അച്ഛനെന്നൊപ്പമുണ്ടെങ്കിലാരും
കളി പറഞ്ഞെന്നെ കരയിക്കില്ല
മറ്റുള്ള കുട്ടികൾ വരും പോലെ ഞാനും
അച്ഛനെ കൂട്ടി സ്കൂളിലെത്തും
കൂട്ടുകാർക്കൊക്കെ കാട്ടിക്കൊടുക്കണം
പുത്തനുടുപ്പും സമ്മാനവും
തൊടിയിലെ മാവിന്റെ കൊമ്പത്തൊരു നല്ല
ഊഞ്ഞാലൊരുക്കി ആടിടേണം
അച്ഛനും അമ്മയ്ക്കും ചേച്ചിക്കുമൊപ്പം
കാഴ്ചകൾ കാണുവാൻ യാത്ര പോണം
ഇന്നലെ കേട്ടു പഠിച്ചൊരാ പാട്ടൊന്ന്
അച്ഛനെ പാടി കേൾപ്പിക്കണം
അച്ഛനടുത്തിന്നുണ്ടായിരുന്നെങ്കിൽ
കഥ പറഞ്ഞെന്നെ ഉറക്കിയേനെ
ഇനിയെത്ര നാൾകൾ ഞാൻ കാക്കണമമ്മേ
അച്ഛനെന്തേയിന്നും വരാത്തത്
ഇന്നലെക്കൂടി അച്ഛൻ പറഞ്ഞത്
എത്രയും പെട്ടെന്ന് വരാമെന്നല്ലേ
അച്ഛൻ വരാനുള്ള വിമാനമൊക്കെ
കൊറോണ കാരണം വൈകുമത്രേ
നെഞ്ചോടണച്ചിട്ട് അമ്മ തപിക്കുമ്പോൾ
പൈതലിൻ നെഞ്ചം വിതുമ്പിടുന്നു