പാളങ്ങൾ 

ഒരുമയിലും 

സമാന്തരങ്ങളായി 

വേറിട്ടു നിൽക്കുന്നവർ 

ഒരേ നീളം 

ഒരേ വർണ്ണം 

ഒരേ താളം 

ഒരേ ദൂരം 

ഒരേ പ്രയാണം 

എന്നിട്ടും  

ഒന്നായി ചേരാനാകാത്തവർ

ഒന്നായി ചേർക്കുവാനാകില്ല 

ഒന്നായി പിരിക്കുവാനുമാകില്ല 

നെഞ്ചിലൂടെ കൂകിപ്പായുന്ന ജീവിതഭാരം 

ഒരുമിച്ചു താങ്ങി 

ഞെങ്ങിയും ഞരങ്ങിയും 

പ്രണയം മൂളുന്നവർ 

പലരുടെയും പ്രാണൻറെയും 

പ്രണയത്തിൻറെയും 

ചൂടും ചൂരും അറിഞ്ഞവർ

തേഞ്ഞുരഞ്ഞു തീരുംവരെ 

ഒരുമിച്ചു നീങ്ങുന്നവർ 

വേനലും മഞ്ഞും 

മഴയുടെ ഭാന്തൻ ചൂളവും 

ചിതറിത്തെറിക്കുന്ന മാംസവും രക്തവും 

അവരിലെ പ്രണയത്തെ കെടുത്തുന്നില്ല 

തുരുമ്പിച്ച പ്രായത്തിനും മരണമില്ല