ന്യൂസിലാൻഡ് മലയാളി ക്രിക്കറ്റിന് വിരുന്നൊരുക്കി കേരളാ പ്രീമീയർ ലീഗ്
Mail This Article
ഓക്ലാൻഡ് ∙ ന്യൂസിലാൻഡ് കമ്മ്യൂണിറ്റി ക്രിക്കറ്റ് മത്സരങ്ങളിൽ വച്ച് ഏറ്റവും വലിയ ടൂർണമെന്റായ കേരളാ പ്രിമീയർ ലീഗിന് മാർച്ച് 14 ഞായറാഴ്ച തുടക്കം കുറിക്കും. ഈഡൻ റോസ്കിൽ ക്ലബിന്റെ കീഴിലുള്ള കീത്തേ പാർക്കിൽ വച്ചാണ് 8 ടീമുകൾ പരസ്പരം ഏറ്റുമുട്ടുന്നത്.
കാസർകോട് മാവെറിക്സ്, കണ്ണൂർ കാനോൻസ്, പാലക്കാട് എച്ച്െകഎസ്, തൃശൂർ ജെഗ്ഗർനോട്ട്, ആലപ്പുഴ ട്രോജൻസ്, ഇടുക്കി ഹൈറേഞ്ചേഴ്സ്, എറണാകുളം മച്ചാൻസ്, കോട്ടയം വാരിയേഴ്സ് എന്നീ ടീമുകളിൽ ഓക്ലാൻഡ് ഹാമിൽട്ടൺ, വെല്ലിംഗ്ടൺ, ക്രൈസ്റ്റ് ചർച്ച് എന്നിവടങ്ങളിൽ നിന്നുള്ള താരങ്ങളാണു പങ്കെടുക്കുന്നത്. 6 ദിവസങ്ങളിലായി നടക്കുന്ന മത്സരങ്ങൾ ഏപ്രിൽ മധ്യത്തോടെ പര്യവസാനിക്കും.
ഒന്നാം സ്ഥാനക്കാർക്ക് 4000 ഡോളറും ട്രോഫിയും, രണ്ടാം സ്ഥാനക്കാർക്ക് 2000 ഡോളറും ട്രോഫിയും, മികച്ച പ്രകടനം കാഴ്ച വയ്ക്കുന്ന താരങ്ങൾക്ക് ഒട്ടനവധി സമ്മാനങ്ങളും ഉണ്ട് എന്നുള്ളതാണ് ഈ ടൂർണമെന്റിന്റെ മാറ്റു കൂട്ടുന്നത്.
120 ൽ പരം മലയാളി കായിക പ്രതിഭകളെ ലേല(Auction) പ്രക്രിയയിലൂടെയാണ് ഓരോ ടീമുകളും നേടിയെടുത്ത് . പ്രൗഡഗംഭീരമായി നടത്തിയ ഓക്ഷൻ നൈറ്റ് ഈ ടൂർണമെന്റിന്റെ മാറ്റ് വിളിച്ചോതുന്നതായിരുന്നു.
മലയാളി കായിക താരങ്ങളുടെ വളർച്ചയും ജീവകാരുണ്യ പ്രവർത്തനങ്ങളുമാണ് ഈ കായിക സംരഭത്തിലൂടെ ലക്ഷ്യമിടുന്നത് എന്നു സംഘാടകരായ രജ്ഞിത്ത് രവീന്ദ്രൻ, ശ്രീകാന്ത് വിദ്യാധരൻ, അലൻ ജോയി എന്നിവർ പറഞ്ഞു. സെഹിയോൻ ആൻഡ് സോളിഡിറ്റിയാണ് ടൂർണമെന്റിന്റെ മുഖ്യ സ്പോൺസർ.