യാക്കോബായ സുറിയാനി സഭക്ക് ബ്രിസ്ബേനിൽ പുതിയ ദേവാലയം

ബ്രിസ്‌ബേൻ∙ഓസ്‌ട്രേലിയയിലെ പ്രധാന നഗരമായ ബ്രിസ്ബേനിൽ യാക്കോബായ സുറിയാനി സഭാ മക്കൾക്ക് പുതിയ ദേവാലയത്തിന്റെ നിർമാണം പൂർത്തിയായി . ദേവാലയത്തിന്റെ മൂറോൻ കൂദാശ ആകമാന സുറിയാനി ഓർത്തഡോക്സ് സഭയുടെ ഓസ്ട്രേലിയ-ന്യൂസീലൻഡ് അതിഭദ്രാസനങ്ങളുടെ മോർ മിലിത്തിയോസ്‌ മൽക്കി മെത്രാപോലിത്ത ജൂൺ 18,19 തീയതികളിൽ നിർവഹിക്കും . ക്വീൻസ്‌ലാൻഡ് സംസ്ഥാനത്തിലെ സുറിയാനി സഭയുടെ ആദ്യ ഇടവകയാണ് സെന്റ് തോമസ് യാക്കോബായ സുറിയാനി ഓർത്തഡോക്സ് പള്ളി .

ബ്രിസ്‌ബേൻ നഗരത്തിന്റെ ഹൃദയഭാഗത്തുനിന്നും 25 കിലോമീറ്റർ മാത്രം അകലെ 1.05 ഏക്കർ സ്ഥലത്താണ് പുതിയ ദേവാലയയവും അനുബന്ധ സൗകര്യങ്ങളും നിർമിച്ചിരിക്കുന്നത് . ശ്രേഷ്ഠ കാതോലിക്ക ബസേലിയോസ് തോമസ് പ്രഥമൻ ബാവായുടെ അനുവാദ കൽപനയാൽ 2008 ഇൽ ആണ് ബ്രിസ്ബേനിൽ യാക്കോബായ സഭയുടെ ആദ്യ കോൺഗ്രിഗേഷൻ ഫാ . ഉല്ലാസ് വർക്കിയുടെ (ഇപ്പോഴത്തെ കോഴിക്കോട് ഭദ്രാസനാധിപൻ പൗലോസ് മോർ ഐറേനിയോസ് മെത്രാപോലിത്ത ) നേതൃത്വത്തിൽ സമാരംഭിച്ചത് . ദൈവാനുഗ്രഹത്താൽ ഇന്നു നൂറിൽ പരം കുടുംബങ്ങൾ ഉൾപ്പെടുന്ന ഈ ഇടവക, ഒരു വ്യാഴവട്ടക്കാലത്തെ മാറി മാറി വന്ന വികാരിമാരുടെയും ഭരണസമിതികളുടെയും ഇടവക ജനത്തിന്റെയും പ്രാർത്ഥനയുടെയും കഠിനാധ്വാനത്തിന്റെയും ഫലമായാണ് മനോഹരമായ പുതിയ ദേവാലയയം പണിതുയർത്തിയിരിക്കുന്നത് .

പരിശുദ്ധ പാത്രിയർക്കീസ് മോർ ഇഗ്നാത്തിയോസ് അഫ്രേം രണ്ടാമൻ ബാവ അനുഗ്രഹിച്ചു ആശിർവദിച്ച അടിസ്ഥാന ശിലയുടെ സ്ഥാപനം 2019 ഒക്ടോബർ 5 നു യാക്കോബായ സഭയുടെ യൂറോപ്പ് ഭദ്രാസനത്തിന്റെയും വൈദീക സെമിനാരി റസിഡന്റ് മെത്രാപ്പോലീത്തയുമായ കുര്യാക്കോസ് മോർ തെയോഫിലോസ് നിർവഹിച്ചു ദേവാലയയ നിർമാണത്തിന് പ്രാർത്ഥനാനിർഭരമായ തുടക്കം കുറിച്ചു . മഞ്ഞനിക്കര ദയറാധിപനും ഓസ്ട്രേലിയ ന്യൂസീലൻഡ് ഭദ്രാസങ്ങളുടെ പാത്രിയാർക്കൽ വികാരിയും ആയ ഗീവർഗീസ് മോർ അത്താനോസ്യോസ് മെത്രാപ്പോലീത്തയുടെ മേൽനോട്ടത്തിലും വികാരി ഫാ . ലിലു വർഗീസ് പുലിക്കുന്നിലിന്റെ നേതൃത്വത്തിലും ആണ് നിർമാണം പൂർത്തിയാകുന്നത് .

ദേവാലയ കൂദാശക്കും തുടർന്ന് ജൂലൈ 3,4 തീയതികളിൽ ദേവാലയയത്തിന്റെ പ്രധാന പെരുന്നാളിന്റെ അനുഗ്രഹകരമായ നടത്തിപ്പിനും ആയി ഷിബു എൽദോ തേലക്കാട്ട് (സെക്രട്ടറി ) , ബിജു വർഗീസ് (ബിൽഡിംഗ് കോഓർഡിനേറ്റർ ) , ജോബിൻ ജേക്കബ് (ട്രസ്റ്റി ) എന്നിവർ ജനറൽ കൺവീനർമാരായി വിവിധ സബ് കമ്മിറ്റികൾ പ്രാർത്ഥനാപൂർവ്വം പ്രവർത്തിച്ചു വരുന്നു.