സിഡ്നിയിൽ കടലിൽ വീണു മരിച്ച മലയാളി വീട്ടമ്മമാരുടെ കബറടക്കം അവിടെ നടത്തും

കോഴിക്കോട് ∙ ഓസ്ട്രേലിയയിലെ സിഡ്നിയിൽ കടലിൽ മുങ്ങിമരിച്ച രണ്ടു മലയാളി വീട്ടമ്മമാരുടെ കബറടക്കം അവിടെത്തന്നെ നടത്തും. തിങ്കൾ വൈകിട്ടുണ്ടായ അപകടത്തിൽ കോഴിക്കോട് മോഡേൺ ബസാർ പാലക്കുളം എൻസി ഹൗസിൽ നൈർഷ ഹാരിസ്(38), കണ്ണൂർ നടാൽ ഹിബയിൽ മർവ ഹാഷിം (35) എന്നിവരാണു മരിച്ചത്. നൈർഷയുടെ സഹോദരി റോഷ്നയ്ക്കും പരുക്കേറ്റിട്ടുണ്ട്. സതർലൻഡിലെ കേർനൽ ബീച്ചിലാണ് അപകടം.

ഈയിടെ ഓസ്ട്രേലിയയിൽ എത്തിയ റോഷ്നയ്ക്കൊപ്പം ബീച്ചിൽ എത്തിയതായിരുന്നു നൈർഷയും ഭർത്താവ് ഹാരിസും മർവയും. പാറക്കെട്ടിൽനിന്ന് അബദ്ധത്തിൽ കടലിൽ വീണെന്നാണു ബന്ധുക്കൾക്കു ലഭിച്ച വിവരം. പൊലീസും രക്ഷാസേനയും ഹെലികോപ്റ്ററിന്റെ സഹായത്തോടെ കടലിൽ തിരച്ചിൽ നടത്തി റോഷ്നയെ ആദ്യം തന്നെ കരയിലെത്തിച്ചു. നൈർഷയെയും മർവയെയും അബോധാവസ്ഥയിലാണ് കരയിലെത്തിച്ചത്.