സഹപ്രവർത്തകന്റെ മരണത്തില്‍ മനംനൊന്ത് പൊലീസ് ഓഫിസർ ആത്മഹത്യ ചെയ്തു

ന്യൂയോർക്ക്∙ സഹപ്രവർത്തകന്റെ മരണത്തിൽ മനംനൊന്ത് ജോണി റിയോസ് എന്ന മുപ്പത്തിഅഞ്ചുകാരൻ ആത്മഹത്യ ചെയ്തു. ന്യൂയോർക്ക് പൊലീസ് ഓഫിസർ ആയിരുന്ന ഇദ്ദേഹത്തിന്റെ സുഹൃത്ത് കെവിൻ പ്രിസ് മാസങ്ങൾക്ക് മുൻപ് ആത്മഹത്യ ചെയ്തിരുന്നു. 

ഏഴുവർഷമായി ന്യൂയോർക്ക് പൊലീസ് ഡിപാർട്ട്മെന്റിൽ ജോലിചെയ്തു വരികയായിരുന്നു ജോണി റിയോസ്. ചൊവ്വാഴ്ച രാവിലെ  താമസിച്ചിരുന്ന അപാർട്ട്മെന്റിൽ വച്ച് സ്വയംവെടിയുതിർത്താണ് ഇദ്ദേഹം ആത്മഹത്യ ചെയ്തത്. സംഭവസമയത്ത് അദ്ദേഹത്തിന്റെ പെൺസുഹൃത്ത് മാത്രമാണ് ഉണ്ടായിരുന്നത്. ഇതോടെ ഈവർഷം ന്യൂയോർക്ക് പൊലീസ് സേനയിൽ ആത്മഹത്യ ചെയ്യുന്ന ഓഫിസർമാരുടെ എണ്ണം എട്ടായി. 

ജോലിയുടെ ഭാഗമായി മാനസികസംഘർഷം അനുഭവിക്കുന്ന ഓഫിസർമാരാണ് ആത്മഹത്യ ചെയ്യുന്നതെന്നാണ് റിപ്പോർട്ട്. ഇവർക്ക് കൗണ്‍സിലിങ്ങിനുള്ള സൗകര്യം ഏർപ്പെടുത്തിയിട്ടുണ്ടെന്ന് കമ്മീഷ്ണർ വ്യക്തമാക്കി.