ഡാലസിൽ ഹിമപാതവും കനത്ത പേമാരിയും
Mail This Article
ഡാലസ് ∙ 2017 ജനുവരി 6 നുശേഷം ഡാലസ് ഫോർട്ട്വർത്തിൽ ആദ്യമായി കനത്ത ഹിമപാതം (മഞ്ഞുവീഴ്ച) ഉണ്ടായതായി ദേശീയ കാലാവസ്ഥാ സർവ്വീസ് റിപ്പോർട്ട് ചെയ്തു. ജനുവരി 11 ശനിയാഴ്ച രാവിലെ വിവിധ ഭാഗങ്ങളിൽ ആരംഭിച്ച ഹിമപാതം ഡന്റൻ വൈസ് കൗണ്ടികളിൽ മൂന്ന് ഇഞ്ച് വരെ ലഭിച്ചതായും കാലാവസ്ഥ നിരീക്ഷകർ അറിയിച്ചു. വെള്ളിയാഴ്ച ഉച്ചയ്ക്കുശേഷം മെട്രോ പ്ലെക്സിന്റെ വിവിധ സ്ഥലങ്ങളിൽ കനത്ത മഴയും ലഭിച്ചിരുന്നു.
പല ഭാഗങ്ങളിലും പേമാരി വാഹന ഗതാഗതത്തെ സാരമായി ബാധിച്ചു. നിരവധി വാഹനാപകടങ്ങളാണ് റിപ്പോർട്ട് ചെയ്തത്. 144 ലധികം വിമാന സർവ്വീസുകൾ റദ്ദ് ചെയ്യുകയും പല സർവ്വീസുകളും വൈകി പുറപ്പെടുകയും ചെയ്തു.
ഡാലസിലെ താപനില കഴിഞ്ഞ ദിവസങ്ങൾ അറുപത്–എഴുപത് ഡിഗ്രി വരെ ഉയർന്നിരുന്നു. വെള്ളിയാഴ്ച രാത്രിയോടെ താപനില താഴുകയും ശനിയാഴ്ച രാവിലെ 35 ഡിഗ്രിയിൽ എത്തുകയും ചെയ്തു. അപ്രതീക്ഷിതമായി ലഭിച്ച ഹിമപാതം എല്ലാവരും ആഘോഷിച്ചു.