താങ്ക്‌സ് ഗീവിങ് യാത്രകള്‍ പ്രശ്‌നമാകുമോ?, പ്രത്യാഘാതം വരും ദിവസങ്ങളിലറിയാം; കോവിഡ് കുതിപ്പില്‍ യുഎസ്

ഹൂസ്റ്റണ്‍ ∙ പത്തു ലക്ഷം കോവിഡ് രോഗികളുള്ള സംസ്ഥാനമായി മാറൻ ഫ്ളോറിഡ. രാജ്യത്ത് മരിച്ചവരുടെ എണ്ണം രണ്ടേമുക്കാല്‍ ലക്ഷം കവിയുന്നു. വാക്‌സീന്‍ വിതരണത്തിനു വേണ്ടിയുള്ള അനുമതിക്ക് വേണ്ടി മൂന്നു കമ്പനികള്‍ കാത്തിരിക്കുന്നു. അതിനിടയില്‍ താങ്ക്‌സ് ഗീവിങ് ഡേയില്‍ ജനങ്ങള്‍ കൂടുതലായി ഇറങ്ങി സഞ്ചരിച്ചതോടെ വൈറസ് വ്യാപനം വീണ്ടും പതിന്മടങ്ങായി. ഫെഡറല്‍ ആരോഗ്യവിദഗ്ധരുടെ മുന്നറിയിപ്പുകള്‍ വകവയ്ക്കാതെ ഇറങ്ങിയതിന്റെ ഫലമായി രാജ്യത്ത് കോവിഡ് ബാധിതരുടെ എണ്ണം 13,751,337 ആയി ഉയര്‍ന്നു. 12.54 ലക്ഷം രോഗികളുമായി ടെക്‌സാസാണ് മുന്നില്‍. 12.17 ലക്ഷവുമായി കാലിഫോര്‍ണിയ തൊട്ടുപിന്നിലുണ്ട്. 9.92 ലക്ഷവുമായി ഫ്‌ളോറിഡ മൂന്നാം സ്ഥാനത്തും. ഇല്ലിനോയിസ്, ന്യൂയോര്‍ക്ക്, ജോര്‍ജിയ, ഒഹായോ, വിസ്‌കോണ്‍സിന്‍, മിഷിഗണ്‍, ടെന്നസി, നോര്‍ത്ത് കരോലിന, പെന്‍സില്‍വാനിയ, ന്യൂജേഴ്‌സി, ഇന്ത്യാന, അരിസോണ, മിനസോട്ട, മിസൗറി, അലബാമ, വിര്‍ജീനിയ, ലൂസിയാന, കൊളറാഡോ എന്നീ സംസ്ഥാനങ്ങളാണ് ആദ്യ ഇരുപതിലുള്ളത്. ഇതില്‍ 110,982 യുഎസ് മിലിട്ടറി അംഗങ്ങള്‍ക്കും, 109,716 വെറ്ററന്‍ അഫേഴ്‌സില്‍ പെട്ടവര്‍ക്കും രോഗം പിടിപെട്ടു. ഫെഡറല്‍ തടവുകാരില്‍ 27,669 പേര്‍ക്കാണ് കോവിഡ് ബാധിച്ചത്. ഗ്രാന്‍ഡ് പ്രിന്‍സസ്, ഡയമണ്ട് പ്രിന്‍സസ് എന്നീ ആഡംബരകപ്പലും കോവിഡ് പിടിയിലായി യുഎസ് തീരത്തുണ്ട്. മരണവും രോഗബാധയുമെല്ലാം കുതിച്ചു തന്നെ. താങ്ക്‌സ് ഗീവിങ് ഡേയോടനുബന്ധിച്ചുള്ള വാരാന്ത്യത്തില്‍ യാത്ര ചെയ്തതിന്റെ പ്രത്യാഘാതം വരാനിരിക്കുന്നതേയുള്ളു. ഈ സമയത്ത് പൊതു ഉദ്യോഗസ്ഥരുടെ ഉപദേശം നിരസിച്ച് ദശലക്ഷക്കണക്കിന് ആളുകള്‍ യാത്ര ചെയ്തു.

ട്രാന്‍സ്‌പോര്‍ട്ടേഷന്‍ സേഫ്റ്റി അഡ്മിനിസ്‌ട്രേഷന്‍ ഡാറ്റ അനുസരിച്ച്, ഏകദേശം 800,000 മുതല്‍ ഒരു ദശലക്ഷം ആളുകള്‍ അവധിക്കാലത്തിന് മുമ്പും ശേഷവുമുള്ള ദിവസങ്ങളില്‍ ഓരോ ദിവസവും ചെക്ക്‌പോസ്റ്റുകള്‍ കടന്നു. കഴിഞ്ഞ വര്‍ഷത്തെ ഇതേ കാലയളവിനേക്കാള്‍ വളരെ കുറവാണിതെങ്കിലും എപ്പിഡെമിയോളജിസ്റ്റുകള്‍ കണക്കു കൂട്ടിയതിനേക്കാളും വളരെ ഉയര്‍ന്നതാണിത്. യുണൈറ്റഡ് എയര്‍ലൈന്‍സ് വക്താവ് അന്നബെല്‍ കോട്ടി പറഞ്ഞു, താങ്ക്‌സ്ഗിവിംഗ് ആഴ്ച 'മാര്‍ച്ച് മുതല്‍ ഏറ്റവും തിരക്കേറിയതാണ്'. എന്നാല്‍ പലരും കോവിഡിനെ പേടിച്ച് എയര്‍ലൈന്‍ ഉപേക്ഷിച്ച് റോഡുകളിലൂടെ യാത്ര ചെയ്തു. ബസ്, ട്രെയിന്‍, ക്രൂയിസ് യാത്രകളില്‍ ഗണ്യമായ കുറവുണ്ടാകുമെന്ന പ്രവചനം ശരിയായെങ്കിലും കാര്‍ യാത്രയില്‍ വലിയ വര്‍ദ്ധനവുണ്ടായി.

രാജ്യത്തൊട്ടാകെയുള്ള കേസുകളുടെ എണ്ണവും ആശുപത്രികളിലെ രോഗികളുടെ എണ്ണവും ഗണ്യമായി വർധിച്ചതിനാല്‍, രാഷ്ട്രീയ നേതാക്കളും മെഡിക്കല്‍ വിദഗ്ധരും മറ്റുള്ളവരുമായി ചേര്‍ന്ന് വൈറസ് പടരുന്നതിന്റെ അപകടങ്ങളെക്കുറിച്ച് മുന്നറിയിപ്പ് നല്‍കിയിരുന്നു. നവംബറില്‍ മാത്രം 4.1 ദശലക്ഷത്തിലധികം കേസുകളും 25,500 ലധികം മരണങ്ങളും ഉണ്ടായിട്ടുണ്ട്. കോവിഡ് ട്രാക്കിംഗ് പ്രോജക്ടിന്റെ കണക്കനുസരിച്ച് നവംബര്‍ 28 വരെ 91,635 പേര്‍ വിവിധ ആശുപത്രികളിലായി അഡ്മിറ്റിലാണ്. നവംബര്‍ ഒന്നിനേക്കാള്‍ ഇരട്ടി, ഒക്ടോബര്‍ ഒന്നിനെ വച്ചു നോക്കുമ്പോള്‍ മൂന്നിരട്ടി.

'ഒത്തുചേരലുകള്‍, ഇന്‍ഡോര്‍ ഒത്തുചേരലുകള്‍ നിങ്ങള്‍ക്ക് കഴിയുന്നത്ര ചെറുതാക്കുക,' രാജ്യത്തെ മികച്ച പകര്‍ച്ചവ്യാധി നിയന്ത്രണ വിദഗ്ധനായ ഡോ. ആന്റണി എസ്. ഫൗസി കഴിഞ്ഞ ആഴ്ച പറഞ്ഞു. ആ ത്യാഗം ചെയ്യുന്നതിലൂടെ, 'നിങ്ങള്‍ ആളുകളെ രോഗബാധിതരാകുന്നത് തടയാന്‍ പോകുന്നു.' രോഗ നിയന്ത്രണത്തിനും പ്രതിരോധത്തിനുമുള്ള കേന്ദ്രങ്ങളുിലും യാത്ര ചെയ്യരുതെന്ന് ജനങ്ങളോട് അഭ്യര്‍ത്ഥിച്ചിരുന്നു. 'എല്ലാ അമേരിക്കക്കാരും തങ്ങളുടെ പ്രിയപ്പെട്ടവരെ സംരക്ഷിക്കാന്‍ തങ്ങളാല്‍ കഴിയുന്നതെല്ലാം ചെയ്യണം,' സി.ഡി.സിയിലെ കോവിഡ് 19 മാനേജര്‍ ഡോ. ഹെന്റി വാള്‍ക്ക് വാര്‍ത്താ സമ്മേളനത്തില്‍ മാധ്യമങ്ങളോട് പറഞ്ഞു. അത്തരം ശുപാര്‍ശകള്‍ സാര്‍വ്വത്രികമായി പാലിക്കുമെന്ന് പ്രതീക്ഷിക്കുന്നത് യാഥാര്‍ത്ഥ്യത്തിന് നിരക്കാത്തതാണെങ്കിലും, ആ തീരുമാനങ്ങളുടെ അനന്തരഫലങ്ങള്‍ അടുത്ത ആഴ്ചകളില്‍ കണ്ടു തുടങ്ങും.

വൈറ്റ് ഹൗസ് കൊറോണ വൈറസ് റെസ്‌പോണ്‍സ് കോഓര്‍ഡിനേറ്റര്‍ ഡോ. ഡെബോറ എല്‍. ബിര്‍ക്‌സ് പറഞ്ഞു, 'നിങ്ങള്‍ രോഗബാധിതനാണെന്നും മറ്റു യാത്രക്കാര്‍ക്ക് അതു പടരുമെന്നും കരുതുക. അതു കൊണ്ട് തീര്‍ച്ചയായും നിങ്ങള്‍ ദീര്‍ഘദൂര യാത്ര ചെയ്യുന്നവരെല്ലാം തന്നെ സ്വയം ക്വാറന്റീനിലാവുന്നത് നല്ലതാണ്.' 65 വയസ്സിനു മുകളില്‍ പ്രായമായവരും ഏതെങ്കിലും അസുഖത്തിന് ദീര്‍ഘകാലമായി ചികിത്സ തേടുന്നവരും യാത്ര ഒഴിവാക്കണമെന്ന് അവര്‍ ആവശ്യപ്പെട്ടു. അതേസമയം, സിഡിസി. രോഗബാധിതരായ ആളുകള്‍ക്ക് ശുപാര്‍ശ ചെയ്യപ്പെടുന്ന ക്വാറന്റീൻ കാലയളവ് കുറയ്ക്കുന്നതിനെക്കുറിച്ച് ആലോചിക്കുന്നു. അവധിക്കാല യാത്ര വൈറസിന്റെ വ്യാപനത്തെ ബാധിക്കുമോയെന്ന് അറിയാന്‍ ഇനിയും ദിവസങ്ങള്‍ വേണ്ടി വരും. പുതിയ ഗവേഷണങ്ങള്‍ സൂചിപ്പിക്കുന്നത് രോഗലക്ഷണങ്ങള്‍ ആരംഭിക്കുന്നതിന് രണ്ട് ദിവസം മുമ്പും അതിനുശേഷം അഞ്ച് ദിവസത്തേക്കും ആളുകള്‍ ഏറ്റവും കൂടുതല്‍ പകര്‍ച്ചവ്യാധികളായിരിക്കുമെന്നാണ്. അതായത് ഈ ആഴ്ച നിര്‍ണായകമാകും.

മിക്കവാറും എല്ലാ പ്രദേശങ്ങളും ഇപ്പോള്‍ ഹോട്ട് സ്‌പോട്ടായിരിക്കുന്ന നിലയിലാണു രാജ്യം. മൊണ്ടാന, വോമിങ് എന്നിവ പോലെ ഒരു കാലത്ത് കോവിഡ് ഇല്ലാതിരുന്ന സംസ്ഥാനങ്ങള്‍ ഇപ്പോള്‍ റെക്കോര്‍ഡ് മരണങ്ങളും അണുബാധകളും റിപ്പോര്‍ട്ട് ചെയ്തിട്ടുണ്ട്. ഹോപ്കിന്‍സ് സര്‍വകലാശാല ഡാറ്റാബേസ് അനുസരിച്ച്, ആഴ്ചയില്‍ ഒരു ലക്ഷത്തിലധികം കേസുകള്‍ റിപ്പോര്‍ട്ട് ചെയ്യുന്ന ആദ്യത്തെ സംസ്ഥാനമായി കാലിഫോര്‍ണിയ ഞായറാഴ്ച മാറി. ന്യൂജേഴ്‌സിയില്‍ കഴിഞ്ഞ രണ്ടാഴ്ചയ്ക്കിടെ ആശുപത്രിയില്‍ പ്രവേശിക്കുന്നവരുടെ എണ്ണം 60 ശതമാനവും മരണങ്ങള്‍ 78 ശതമാനവുമായും വര്‍ദ്ധിച്ചു. നവംബറിലെ മൂന്ന് ദിവസങ്ങളിലായി സംസ്ഥാനത്തെ ഏറ്റവും വലിയ നഗരമായ നെവാര്‍ക്കിലെ പോസിറ്റീവ് നിരക്ക് 19 ശതമാനമായിരുന്നു.

വാക്‌സിന്‍ ട്രയലില്‍ പങ്കെടുക്കുന്നവര്‍ അവരുടെ അനുഭവങ്ങള്‍ വിവരിക്കുകയും ഈ പ്രക്രിയയെക്കുറിച്ചുള്ള കാഴ്ചക്കാരുടെ ചോദ്യങ്ങള്‍ക്ക് ഉത്തരം നല്‍കുകയും ചെയ്യുന്ന രീതിയും ഇപ്പോള്‍ വ്യാപകമായിട്ടുണ്ട്. ഇത് വലിയൊരു അളവ് വരെ ആശ്വാസമാണെന്ന് പലരും പറയുന്നു. ആസ്ട്രാസെനിക്കയുടെ ട്രയലില്‍ പങ്കെടുത്ത തന്റെ അനുഭവത്തെക്കുറിച്ച് താന്‍ പോസ്റ്റുചെയ്തുവെന്ന് നാഷ്‌വില്ലില്‍ നിന്നുള്ള ആഷ്‌ലി ലോക്ക് (29) പറഞ്ഞു, ഇത് കണ്ടത് രണ്ട് ദശലക്ഷത്തിലധികം കാഴ്ചക്കാരാണ്. ആ പോസ്റ്റ് മുതല്‍, അവള്‍ വീഡിയോകള്‍ സൃഷ്ടിക്കുകയും പാര്‍ശ്വഫലങ്ങളെക്കുറിച്ചുള്ള അവളുടെ അഭിപ്രായം രേഖപ്പെടുത്തുകയും ചെയ്യുന്നു. ട്രയലിന്റെ ഭാഗമായതിനു ശേഷവും മാസ്‌കുകള്‍ ധരിക്കുന്നതിനെക്കുറിച്ച് പലരും ചോദ്യങ്ങള്‍ ചോദിച്ചിരുന്നു. പക്ഷേ, അതിന് ഉത്തരമില്ലായിരുന്നു. വാക്‌സിന്‍ എടുത്താലും വീണ്ടും കോവിഡ് വരുമോയെന്ന സാധാരണക്കാരന്റെ ചോദ്യത്തിന് ഇനിയും ഉത്തരമാകേണ്ടതുണ്ട്.