റവ.ജേക്കബ് പി.തോമസിനും കുടുംബത്തിനും യാത്രയയപ്പ് നൽകി
Mail This Article
ഹൂസ്റ്റൺ∙ ട്രിനിറ്റി മാർത്തോമാ ഇടവക വികാരിയായി മൂന്നു വർഷത്തെ സ്തുത്യർഹ സേവനം നിര്‍വഹിച്ച ശേഷം ബാംഗ്ലൂർ പ്രിംറോസ് മാർത്തോമാ ഇടവകയിലേക്കു സ്ഥലം മാറി പോകുന്ന റവ.ജേക്കബ്.പി. തോമസിനും കുടുംബത്തിനും ഇടവക സമുചിത യാത്രയയപ്പ് നൽകി.
ഏപ്രിൽ 25നു ഞായറാഴ്ച രാവിലെ വിശുദ്ധ കുർബാന ശുശ്രൂഷക്കു ശേഷം ട്രിനിറ്റി ദേവാലയത്തിൽ നടന്ന യാത്രയയപ്പു സമ്മേളനത്തിൽ അസി.വികാരി റവ. റോഷൻ.വി.മാത്യൂസ് അധ്യക്ഷത വഹിച്ചു. ഇടവക ഗായകസംഘത്തിന്റെ പ്രാരംഭ ഗാനത്തിന് ശേഷം ഇടവക മിഷൻ സെക്രട്ടറി ഏബ്രഹാം കെ.ഇടിക്കുള പ്രാർത്ഥിച്ചു.
ഇടവക വൈസ് പ്രസിഡന്റ് ഷാജൻ ജോർജ്, അച്ചനും കുടുംബത്തിനും യാത്രാമംഗളങ്ങൾ ആശംസിച്ചു കൊണ്ട് ഏവരെയും സമ്മേളനത്തിലേക്ക്‌ സ്വാഗതം ചെയ്തു. തുടർന്ന് റവ. റോഷൻ.വി.മാത്യൂസ് അധ്യക്ഷപ്രസംഗം നടത്തി.നാളിതുവരെ അച്ചനിൽ നിന്നും ലഭിച്ച സഹോദര തുല്യമായ കരുതലും സ്‌നേഹവും എന്നും ഓർമ്മിപ്പിക്കപ്പെടുമെന്നും റോഷൻ അച്ചൻ അധ്യക്ഷ പ്രസംഗത്തിൽ ചൂണ്ടിക്കാട്ടി. സഭയിലെ സീനിയർ വൈദികരിലൊരാളും ഇടവകാംഗവുമായ റവ. ഉമ്മൻ ശാമുവേൽ, ഇടവക സെക്രട്ടറി റജി ജോർജ് എന്നിവർ യാത്രാമംഗളാശംസകൾ നേർന്നു സംസാരിച്ചു. ഇടവക ഫിനാൻസ് ട്രസ്റ്റി ഏബ്രഹാം ജോസഫ് (ജോസ്) അക്കൗണ്ട്സ് ട്രസ്റ്റി ജോർജ് പുളിന്തിട്ട എന്നിവരും യാത്രാമംഗളങ്ങൾ നേർന്ന് ഇടവകയുടെ പാരിതോഷികം അച്ചനു സമ്മാനിച്ചു.
അച്ചനും കുടുംബവും ഇടവകയ്ക്ക് നൽകിയ എല്ലാ നിസ്വാർത്ഥ സേവനങ്ങളെയും പ്രവർത്തനങ്ങളെയും സംസാരിച്ചവർ സ്മരിക്കുകയും പ്രകീർത്തിക്കുകയും ചെയ്തു. പ്രത്യേകിച്ച് കോവിഡ് കാലഘട്ടത്തിൽ ഇടവകയ്ക്ക് അച്ചനിൽ നിന്നും ലഭിച്ച ശുശ്രൂഷകൾ പ്രശംസനീയമായിരുന്നു. ഇടവകയുടെ ഓഡിയോ വിഡിയോ മിനിസ്ട്രി ടീം അച്ചന്റെയും കുടുംബത്തിന്റയും ഹൂസ്റ്റണിലെ നല്ല ഓർമകൾ പങ്കിടുന്നതായ നിരവധി ഫോട്ടോകൾ കോർത്തിണക്കി പ്രദർശിപ്പിച്ച സ്ലൈഡ് ഷോ സമ്മേളനത്തിനു മാറ്റുകൂട്ടി.
ജീവിതത്തിലെ മറക്കാനാവാത്ത അനുഭവങ്ങൾ സമ്മാനിച്ച ഹൂസ്റ്റൺ ട്രിനിറ്റി കുടുംബത്തോട് എന്നും ഞങ്ങൾ കടപ്പെട്ടിരിക്കുന്നുവെന്നും ഞങ്ങളുടെ ഓർമകളിൽ എന്നെന്നും ട്രിനിറ്റി ഉണ്ടായിരിക്കുമെന്നും ജേക്കബ് തോമസ് അച്ചൻ, റിൻസി കൊച്ചമ്മ, മക്കളായ ഹർഷ, ഹന്നാ എന്നിവർ മറുപടി പ്രസംഗത്തിൽ പറഞ്ഞു.
സമ്മേളനത്തിൽ ഭദ്രാസന കൗൺസിൽ അംഗം ഷോൺ വർഗീസ് നന്ദി പ്രകാശിപ്പിച്ചു. സേവികാസംഘം സെക്രട്ടറി ജൂലി മാത്യൂവിന്റെ സമാപന പ്രാർത്ഥനയ്ക്കും ജേക്കബ് പി തോമസ് അച്ചന്റെ ആശിർവാദത്തിനും ശേഷം സമ്മേളനം അനുഗ്രഹകരമായി സമാപിച്ചു. യാത്രയയപ്പു സമ്മേളനത്തിനു ശേഷം സ്‌നേഹവിരുന്നും ക്രമീകരിച്ചിരുന്നു.
ഏപ്രില്‍ 28, ബുധനാഴ്ച, ഉച്ചകഴിഞ്ഞു പെയർലാന്‍റ് പാർസനെജില്‍ ഇടവക ജനങ്ങളും സുഹൃത്തുക്കളുമായ നിരവധി പേർ എത്തി ചേർന്ന് വികാരനിര്‍ഭരമായ ഒരു യാത്രയയപ്പ് നൽകി. സൂം പ്ലാറ്റ്‌ഫോമിൽ കൂടിയും ഇടവക ജനങ്ങൾക്കു യാത്രാമംഗളങ്ങൾ നേരുന്നതിനു ഭാരവാഹികൾ ക്രമീകരണം ചെയ്തിരുന്നു. നിരവധി ഇടവകാംഗങ്ങൾ ഇവരെ യാത്ര അയയ്ക്കാൻ ഹൂസ്റ്റൺ ഇന്‍റര്‍ കോണ്ടിനെന്‍റ്റല്‍ എയർപോർട്ടിലും എത്തിച്ചേർന്നിരുന്നു.
