ഫിന്ലാന്ഡ് നാറ്റോയില് ചേരാന് തയാറെടുക്കുന്നു, ഭീഷണി മണത്ത് റഷ്യ
Mail This Article
ഹൂസ്റ്റണ്∙ റഷ്യയുടെ യുദ്ധം കിഴക്കന് യുക്രെയ്നിനെ തകര്ക്കുകയും ആഗോള സമ്പദ്വ്യവസ്ഥയെ കാര്ന്നുതിന്നുകയും ചെയ്യുന്നതിനിടയ്ക്ക് പ്രസിഡന്റ് വ്ളാഡിമിര് വി. പുടിന് അപ്രതീക്ഷിത പ്രത്യാഘാതം. റഷ്യയുടെ അയല്രാജ്യമായ ഫിന്ലാന്ഡ് നാറ്റോയില് ചേരാന് തയാറെടുക്കുന്നതാണു പുടിനു ഭീഷണി. ഫിന്ലാന്ഡിന്റെ നേതാക്കള് വ്യാഴാഴ്ച നാറ്റോ അംഗത്വത്തിനായി കാലതാമസം കൂടാതെ അപേക്ഷിക്കുമെന്നു പ്രഖ്യാപിച്ചു. അതേസമയം സ്വീഡിഷ് നേതാക്കള് ദിവസങ്ങള്ക്കുള്ളില് ഇതു ചെയ്യുമെന്ന് പ്രതീക്ഷിക്കുന്നു. റഷ്യയുടെ പടിവാതില്ക്കലുള്ള രണ്ടു രാജ്യങ്ങളുടെ ശ്രദ്ധേയമായ മാറ്റമാണിത്. എന്നാല് റഷ്യ യുക്രെയ്ന് ആക്രമിച്ചതിനുശേഷം 11 ആഴ്ചകള്ക്കുള്ളില് സഖ്യത്തില് ചേരുന്നതിന് പൊതുജനാഭിപ്രായം ശക്തമായി.
ഫിന്ലാന്ഡിന്റെ പ്രവേശനം ഭീഷണിയാണെന്നും റഷ്യയുടെ സുരക്ഷ ഉറപ്പാക്കാന് ആവശ്യമായ നടപടികള് കൈക്കൊള്ളുമെന്നും ക്രെംലിന് പറഞ്ഞു. എന്നാല്, സുഗമവും വേഗത്തിലുള്ളതുമായ പ്രവേശന പ്രക്രിയ നാറ്റോയുടെ സെക്രട്ടറി ജനറല് ഫിന്ലന്ഡിന് വാഗ്ദാനം ചെയ്തു. എന്നാല് അതിന് ഒരു വര്ഷമോ അതില് കൂടുതലോ സമയമെടുത്തേക്കാം. ബ്രിട്ടീഷ് പ്രധാനമന്ത്രി ബോറിസ് ജോണ്സണ് ബുധനാഴ്ച അതു നികത്താന് ശ്രമിച്ചു. യൂറോപ്പിലെ ഏറ്റവും ശക്തമായ സൈന്യങ്ങളിലൊന്നായ ബ്രിട്ടന് ഫിന്ലന്ഡുമായും സ്വീഡനുമായും സുരക്ഷാ കരാറുകളില് ഒപ്പുവച്ചു.
യുഎസ് കോണ്ഗ്രസ് യുക്രെയ്നിന് 40 ബില്യണ് ഡോളര് സൈനിക, മാനുഷിക സഹായത്തിന് അംഗീകാരം നല്കാന് സാധ്യതയുള്ളതിനാലാണ് ഈ നീക്കങ്ങള് വരുന്നത്. ഇത് യുക്രേനിയന് സേനയെ സഹായിക്കുന്നതിന് ഉദ്ദേശിച്ചുള്ള ഏറ്റവും പുതിയ പിന്തുണാ പാക്കേജാണ്. എന്നാല് പാശ്ചാത്യ പിന്തുണ റഷ്യയെ തെക്കന്, കിഴക്കന് യുക്രെയ്നിന്റെ വലിയ ഭാഗങ്ങള് കൈവശപ്പെടുത്താനുള്ള ആക്രമണം ലഘൂകരിക്കാന് പ്രേരിപ്പിച്ചില്ല. യുക്രെയ്നിലേക്കു സൈന്യത്തെ അയക്കാന് താന് നിര്ബന്ധിതനാകുന്നതിന് ഒരു കാരണമായി നാറ്റോയുടെ കിഴക്കോട്ടുള്ള വിപുലീകരണത്തെ വിവരിച്ച പുടിനെ ഇതു സഹായിച്ചേക്കാം. റഷ്യയല്ല, പടിഞ്ഞാറാണ് സംഘര്ഷം നയിക്കുന്നത് എന്ന തന്റെ വാദം റഷ്യന് ജനതയോട് ശക്തിപ്പെടുത്താന് ഇത് സഹായിക്കും.
ഫിന്ലാന്ഡിന്റെ നാറ്റോ അംഗത്വം ഒരു ഭീഷണിയാണെന്ന് റഷ്യ വ്യാഴാഴ്ച മുന്നറിയിപ്പ് നല്കി. കീവിന്റെ സേനയെ ആയുധമാക്കി അമേരിക്കയും സഖ്യകക്ഷികളും ഒരു 'പ്രോക്സി യുദ്ധം' നടത്തുന്നതായി പുടിന് ആരോപിച്ചു.
സഖ്യവുമായുള്ള നേരിട്ടുള്ള ഏറ്റുമുട്ടല് ഒഴിവാക്കാന് റഷ്യ ആഗ്രഹിക്കുന്നുവെന്ന് മാധ്യമപ്രവര്ത്തകരോട് ക്രംലിന് വക്താവ് ദിമിത്രി പറഞ്ഞു. പക്ഷേ, ഫിന്ലാന്ഡ് നാറ്റോയില് ചേരുന്നത് റഷ്യയ്ക്ക് നേരിട്ട് ഭീഷണിയാകുമോ എന്ന ചോദ്യത്തിന്, തീര്ച്ചയായും എന്നാണ് അദ്ദേഹം പറഞ്ഞത്. നാറ്റോ വിപുലീകരണം നമ്മുടെ ഭൂഖണ്ഡത്തെ സുരക്ഷിതവുമാക്കുന്നില്ലെന്നും നാറ്റോയുടെ വിപുലീകരണം സൈന്യത്തെ അതിര്ത്തികളിലേക്ക് അടുക്കുന്നതിനെ അടിസ്ഥാനമാക്കിയാണ് മോസ്കോയുടെ പ്രതികരണം നിര്ണ്ണയിക്കപ്പെടുകയെന്ന് അദ്ദേഹം മുന്നറിയിപ്പ് നല്കി. ഫിൻലാൻഡ് നാറ്റോയില് ചേരുകയാണെങ്കില്, 'സൈനിക-സാങ്കേതികവും മറ്റ് സ്വഭാവവുമുള്ള പ്രതികാര നടപടികള് കൈക്കൊള്ളാന്' മോസ്കോയെ നിര്ബന്ധിക്കുമെന്നു റഷ്യയുടെ വിദേശകാര്യ മന്ത്രാലയം പിന്നീട് മുന്നറിയിപ്പ് നല്കി.
യുക്രെയ്നെ നാറ്റോയില് ചേരുന്നതില് നിന്ന് തടയേണ്ടതുണ്ടെന്ന് പുടിന് പറയുന്നു. യുക്രെയ്നെ കൂടെ നിര്ത്താനും സഖ്യത്തിലേക്ക് കൊണ്ടുവരാന് സഹായിക്കുന്നതിന് ഉടനടി പദ്ധതികളൊന്നുമില്ലെന്നു ബൈഡന് ഭരണകൂടം പറയുന്നു. യുക്രെയ്ന് ഒരു നാറ്റോ അംഗമായിരുന്നെങ്കില്, റഷ്യയ്ക്കും മറ്റ് എതിരാളികള്ക്കുമെതിരെ അതിനെ പ്രതിരോധിക്കാന് സഖ്യം ബാധ്യസ്ഥരായിരിക്കും.
റഷ്യയും നാറ്റോയും തമ്മിലുള്ള നേരിട്ടുള്ള സംഘര്ഷം ഒരു സമ്പൂര്ണ്ണ ആണവയുദ്ധമായി മാറാനുള്ള സാധ്യതയുണ്ടെന്ന്
റഷ്യയുടെ മുന് ലിബറല് ചിന്താഗതിക്കാരനായ പ്രസിഡന്റും ഇപ്പോള് മുന്നിര ക്രെംലിന് ഹാര്ഡ് ലൈനറുമായ ദിമിത്രി എ. മെദ്വദേവ് പറഞ്ഞു. . തലസ്ഥാനമായ കീവില് നിന്ന് പിന്വാങ്ങിയതിന് ശേഷം മോസ്കോ നേരിട്ട ഏറ്റവും വലിയ തിരിച്ചടികളിലൊന്നാണ് യുക്രെയ്നിന്റെ വിജയം . ഖാര്കിവില് നിന്ന് ഏകദേശം രണ്ടു മണിക്കൂര് തെക്കുകിഴക്കുള്ള ഇസിയം, ഏപ്രിലില് റഷ്യന് സൈന്യം പിടിച്ചെടുത്തു. യുദ്ധം ഏറ്റവും രൂക്ഷമായ ഡോണ്ബാസ് എന്നറിയപ്പെടുന്ന കിഴക്കന് മേഖലയിലെ കൂടുതല് പ്രദേശങ്ങള് പിടിച്ചെടുക്കാന് മോസ്കോ യുദ്ധം ചെയ്യുന്നു.
ഈ ആഴ്ച ആദ്യം ഇസിയത്തിലേക്കുള്ള റഷ്യന് വിതരണ ലൈനുകള് വിച്ഛേദിക്കാന് യുക്രേനിയന് പ്രത്യാക്രമണം ശ്രമിക്കുന്നതായി റഷ്യന് അനുകൂല മാധ്യമമായ റെഡ്കോവ റിപ്പോര്ട്ട് ചെയ്തു. പ്രാദേശിക ഉക്രേനിയന് ഉദ്യോഗസ്ഥര് ടെലിഗ്രാമില് പോസ്റ്റ് ചെയ്ത ഫോട്ടോകള് പ്രകാരം റഷ്യന് സൈന്യം സപ്ലൈകളും സൈനിക ഉപകരണങ്ങളും കൊണ്ടുപോകാന് ഉപയോഗിച്ചിരുന്ന സെവര്സ്കി ഡൊനെറ്റ്സിനു മുകളിലൂടെയുള്ള നിരവധി പോണ്ടൂണ് പാലങ്ങള് യുക്രേനിയന് സൈന്യം നശിപ്പിച്ചതായി കാണിക്കുന്നു.
ഖാര്കിവിനെ ചുറ്റിപ്പറ്റിയുള്ള തോല്വികള്ക്കിടയിലും ഡോണ്ബാസ് ഉള്പ്പെടുന്ന ലുഹാന്സ്ക്, ഡൊനെറ്റ്സ്ക് മേഖലകളില് റഷ്യന് സൈന്യം നേട്ടമുണ്ടാക്കിയതായി റിപ്പോര്ട്ടുണ്ട്. സീവിയേറോഡൊനെറ്റ്സ്കില് യുദ്ധം രൂക്ഷമായിരുന്നു, ഒറ്റരാത്രികൊണ്ട് ഒൻപതു ബഹുനില കെട്ടിടങ്ങള് നശിപ്പിക്കപ്പെട്ടതായി അദ്ദേഹം പറഞ്ഞു. ആളപായമൊന്നും റിപ്പോര്ട്ട് ചെയ്തിട്ടില്ല. നഗരത്തില് അവശേഷിക്കുന്ന ഏകദേശം 15,000 നിവാസികളില് ഭൂരിഭാഗവും ഭൂഗര്ഭ ഷെല്ട്ടറുകളില് ഒളിച്ചിരിക്കുകയാണെന്നും അദ്ദേഹം കൂട്ടിച്ചേര്ത്തു.