ശമ്പള വർധനവ് ആവശ്യപ്പെട്ട് എയർലൈൻസ് ജീവനക്കാർ വിമാനത്താവളം പിക്കറ്റ് ചെയ്തു
Mail This Article
ലവ്ഫീൽഡ് (ഡാലസ്) ∙ സൗത്ത് വെസ്റ്റ് എയർലൈൻസ് ജീവനക്കാർ ശമ്പള വർധനവും ജോലി സ്ഥിരതയും ആവശ്യപ്പെട്ടു രാജ്യം ഒട്ടാകെ നടത്തുന്ന സമരത്തിന്റെ ഭാഗമായി ഡാലസ് ലവ്ഫീൽഡ് വിമാനത്താവളം പിക്കറ്റ് ചെയ്തു. പിക്കറ്റിങ്ങിനെ തുടർന്നു നിരവധി ഫ്ലൈറ്റുകൾ റദ്ദ് ചെയ്തത് യാത്രക്കാരെ ബുദ്ധിമുട്ടിച്ചു.
ഏകദേശം 500 ഓഫ് ഡ്യൂട്ടി ഫ്ലൈറ്റ് അറ്റന്റർമാരും ട്രാൻസ്പോർട്ട് വർക്കേഴ്സ് യൂണിയൻ അംഗങ്ങളുമാണ് പിക്കറ്റിങ്ങിൽ പങ്കെടുത്തത്. ഡാലസ് ആസ്ഥാനമായി പ്രവർത്തിക്കുന്ന സൗത്ത് വെസ്റ്റ് എയർലൈൻസിൽ 18000 ഫ്ലൈറ്റ് അറ്റന്റർമാരണുള്ളത്. ജീവനക്കാരുടെ അഭാവംമൂലം 24 മണിക്കൂർ ജോലിയെടുക്കേണ്ടി വരുന്നുവെന്നും വീടുകളിൽ കൃത്യസമയങ്ങളിൽ എത്തിചേരുവാൻ കഴിയുന്നില്ലെന്നും യൂണിയൻ നേതാക്കൾ പറഞ്ഞു.
ജീവനക്കാരുടെ എണ്ണം കുറഞ്ഞതും ജോലിഭാരം വർധിച്ചുവെന്നതും അധികൃതർ പരിഗണിക്കുന്നില്ലെന്ന് യൂണിയൻ പരാതിപ്പെട്ടു. ഫെഡറൽ മീഡിയേറ്റർമാരുടെ ഇടപെടൽ സമരം ഒത്തുതീർപ്പാക്കുന്നതിനാവശ്യമാണെന്നും യൂണിയൻ വക്താക്കൾ പറഞ്ഞു.