ന്യൂയോർക്ക് ശ്രീനാരായണ ഗുരു മന്ദിരത്തിന്റെ രണ്ടാം വാർഷികം ആഘോഷിച്ചു

ന്യൂയോർക്ക് ∙ ശ്രീനാരായണ അസോസിയേഷൻ ലോങ്ങ് ഐലൻഡ് ഹെമ്പ്സ്റ്റഡിൽ ഉള്ള ഗുരു മന്ദിരത്തിന്റെ രണ്ടാം വാർഷികം ആഘോഷിച്ചു. 2024 ജൂലായ് 21-ന് ലോങ് ഐലൻഡിൽ നടന്ന ചടങ്ങിൽ  ബഹുമാന്യ അതിഥികളായ സ്വാമി മുക്താനന്ദ യതിയും ഷൗക്കത്തും  പ്രഭാഷണം നടത്തി.

കഴിഞ്ഞ രണ്ട് വർഷമായി സമൂഹത്തിന്റെ അചഞ്ചലമായ പിന്തുണയ്ക്കും പ്രതിബദ്ധതയ്ക്കും നന്ദി പ്രകടിപ്പിച്ച അസോസിയേഷൻ സെക്രട്ടറി ബിജു ഗോപാലൻ   സ്വാഗതം ആശംസിച്ചു. 

വൺ വേൾഡ് സ്കൂൾ ഓഫ് വേദാന്തയുടെ സ്ഥാപകനും ആദരണീയ ആത്മീയ നേതാവുമായ സ്വാമി മുക്താനന്ദ യതി ആദ്യം വേദിയിലെത്തി. സ്വാമി മുക്താനന്ദയുടെ പ്രസംഗത്തെത്തുടർന്ന്, പ്രമുഖ സാഹിത്യകാരനും ഗുരു നിത്യ ചൈതന്യ യതിയുടെ ശിഷ്യനുമായ ഷൗക്കത്ത്, ആധുനിക സമൂഹത്തിൽ ശ്രീനാരായണ ഗുരുവിന്റെ സ്വാധീനത്തെക്കുറിച്ചുള്ള തന്റെ ചിന്തകൾ പങ്കുവച്ചു. അദ്ദേഹത്തിന്റെ കാലത്തെ കർക്കശമായ ഘടനകളെ വെല്ലുവിളിക്കുകയും കൂടുതൽ ഉൾക്കൊള്ളുന്നതും പ്രബുദ്ധവുമായ ഒരു സമൂഹത്തെ പ്രോത്സാഹിപ്പിക്കുകയും ചെയ്ത സാമൂഹ്യ പരിഷ്കരണത്തിനും വിദ്യാഭ്യാസത്തിനും ഗുരുവിന്റെ വിപ്ലവകരമായ സമീപനത്തെക്കുറിച്ച് ഷൗക്കത്ത് സംസാരിച്ചു.

എസ്എൻഎ ഭാരവാഹികൾ ആയ സജി കമലാസനൻ, ബിജു ഗോപാൽ, സന്തോഷ് ചെമ്പൻ, ജനാർധനൻ അയ്യപ്പൻ എന്നിവർ സ്പോൺസർ ചെയ്ത ഗുരുവിന്റ ബാല്യം മുതൽ സമാധി വര ഉള്ള മനോഹരമായ ഛായാചിത്രങ്ങൾ സ്വാമിജിയും ഷൗക്കത്തും ചേർന്ന് ഉദ്ഘാടനം ചെയ്തു. സെക്രട്ടറി ബിജു ഗോപാലൻ മുൻകൈ എടുത്താണ് ചായചിത്രം യാഥാർഥ്യമാക്കിയത്.

രാവിലെ ഗണപതി ഹോമവും ഉച്ചയ്ക്ക് ഗുരു പൂജയും സ്വാമിജിയുടെ കാർമികത്വത്തിൽ നടന്നു. പങ്കെടുത്തവർക്ക് പ്രഭാത ഭക്ഷണം ഭാരവാഹികൾ ഒരുക്കിയിരുന്നു.  ശ്രീനാരായണ ഗുരുവിന്റെ തത്ത്വങ്ങൾ മുന്നോട്ട് കൊണ്ടുപോകുന്നതിനും സമൂഹത്തിൽ ഐക്യത്തിന്റെയും സേവനത്തിന്റെയും മനോഭാവം വളർത്തിയെടുക്കുന്നതിനുള്ള പ്രതിബദ്ധത അസോസിയേഷന്റെ നേതാക്കൾ ആവർത്തിച്ചു. 
(വാർത്ത: റെനിൽ ശശീന്ദ്രൻ)